Kabinet di Aruba na Hulanda na Meet & Greet cu alumnonan di Colegio Arubano

ORANJESTAD (AAN): Un delegacion di Kabinet di Minister Plenipotenciario di Aruba a haci un bishita na Balk,

provincia di Friesland pa a topa y papia cu e grupo di alumnonan di Colegio Arubanan cu e siman aki ta na Hulanda cu un biahe di estudio.

   E delegacion di Kabinet di Aruba a consisti di director Joselin Croes LL.M/M.Sc., Jennifer Sneek di departamento di Enseñansa di Gabinete di Aruba, Sidney Kock PR di Kabinet di Aruba y e studiementornan Garlon Hasham, Shahaira Brokke, Nathaly Deville-Russel y John Dirks.

   Director di Kabinet di Aruba Joselin Croes a tene un discurso pa e alumnonan na unda el a presenta e retonan cu hobennan ta enfrenta ora nan bin studia na Hulanda, manera haya un camber of lugar pa biba, e idioma Hulandes y discriminacion.

  Señora Croes a bisa cu e preparacion na Aruba mester cuminsa tempran, por ehempel inscribi na tempo pa un camber. Si bo ta determina pa bin studia na Hulanda, lesa corantnan Hulandes y mira programanan di television Hulandes. Segun Joselin esaki no unicamente ta yuda na domina e idioma Hulandes, pero tambe pa tin informacion riba e situacion na Hulanda.

   Señora Croes a bolbe enfatisa cu Gabinete di Aruba tey pa sostene nos studiantenan via e sistema di mentor y cu studiantenan no mester warda cu problema, pero acerca su mentor prome cu ta demasiado laat.

   Despues e mentornan individual a papia for di nan experiencia riba diferente aspectonan di studia na Hulanda y recomendacionnan y cu e alumnonan mester prepara nan mes adecuadamente prome cu nan bin Hulanda. E potretnan ta cortesia di Arubahuis.