Jovita Andrade a gana Festival Canto na Português

ORANJESTAD (AAN): Diasabra, 6 di Juni 2026, den conexion cu e celebracion di Dia di Portugal, a tuma lugar un exitoso Festival Canto na Português.

Tabata un anochi especial yen di cultura, musica y alegria, unda tur presente a disfruta di un ambiente di fiesta y tradicion portuguesa. 

Un total di 9 participante a subi escenario pa mustra nan talento interpretando canticanan na idioma português: Felix (Wiwi) Piña, Mariana Pascual, José Fernandes Perna, José de Canha, Bella Andrade, Moisés Dumfries, Lina Andrade, Jovita Andrade y Clark Martina. 

Cada participante a comparti su amor pa musica portuguesa, contribuyendo na un anochi inolvidabel yen di emocion y orguyo cultural. 

E anochi tabata acompaña pa musica biba cu Biba Lekker Band, creando un ambiente unico yen di cultura, tradicion y convivencia. E participante nan a comparti historia, recuerdo y a contribui pa mantene bibo e espiritu português den Aruba. 

Resultadonan di Festival: 

Ganador Absoluto: Jovita Andrade;

Premio Mejor Show: Jovita Andrade;

Premio Popularidad: Felix (Wiwi) Piña;

na di tres lugar: Mariana Pascual

y na di dos lugar: Bella Andrade 

E Directiva di Associação Social Cultural Portuguesa kier expresa su sincero agradecimiento na tur esnan cu a contribui na exito di e actividad. Alavez ta invita comunidad pa celebra Dia di Portugal cu un Santo Sacrificio di Misa diaranson, 10 di Juni na Misa di Nossa Senhora di Fátima – Dakota, cuminsando 7:00 p.m.

Riba e dia especial aki, ta honra y gradici tur e portuguesnan cu a imigra pa Aruba y cu a integra den comunidad, contribuyendo grandemente na desaroyo di nos isla.

Durante hopi añanan, e comunidad portugues a traha duro den diferente sectornan importante, aportando significativamente na progreso economico y social di Aruba.

Awor cu hopi di nan no ta mas cu nos, nos ta sigui recorda nan cu respet y gratitud. Nan esfuerzo, dedicacion, sacrificio y balornan ta keda bibo den nos curazon y den historia di Aruba.

E comunidad portuguesa semper a mantene un union fuerte rond di famia, fe catolico y tradicionnan di Madeira. Nan a crea un comunidad basa riba trabou duro, humildat, respet y union familiar.

Tambe nan a pasa nan idioma, cultura y costumbernan na generacionnan nobo. Hopi di nan yiunan y nietonan a crece bilingüe, papia tanto Papiamento como Português, manteniendo bibo e herencia cultural portuguesa den Aruba.

Durante e Santo Sacrificio di Misa lo gradici pa tur loke e pioneronan portugues a logra y contribui na Aruba, y nos lo honra nan memoria cu orgullo y respet.

-Fiesta Cultural Dia di Portugal

Riba diasabra dia 13 di Juni lo tuma lugar Fiesta Cultural Dia di Portugal na Club Primavera, cuminsando 8:00 p.m. Entrada ta gratis.

Durante e celebracion aki, ta recorda cu orgullo e dedicacion, trabou duro y perseverancia di e comunidad portuguesa na Aruba.

Disfruta di un programa especial cu:

• Participacion di Grupo Folklórico Português
• Participacion di Grupo Folklórico Infantil
• Musica biba y cancionnan na idioma português
• Presencia di e finalistanan di Festival Canto na Português
• Presentacion di poesia
• Ambiente familiar yen di alegria y tradicion

Disfruta di e sabornan autentico di Portugal:

Directiva di Associação Social Cultural Portuguesa y di e Cônsul Honorário di Portugal na Aruba, ta invita tur pueblo di Aruba, e Comunidad Portuguesa y Comunidad Luso-Arubano pa uni cu nos den e gran celebracion cultural aki. Viva Portugal! Viva Aruba!