ORANJESTAD (AAN): Aruba ta sigui di mustra su rol importante den e crisis global di desplasamento forsoso, segun e rapport mas recien di UNHCR (the UN Refugee Agency) pa mita di aña 2024.
E informe ta analisa e estadisticanan sobresaliente di refugiadonan, personanan den busca di asilo, personanan sin nacionalidad y desplasadonan interno durante e prome seis luna di e aña aki.
A base di e cifranan nobo, Aruba ta aparece como un di e paisnan cu mas persona refugia y den necesidad di proteccion internacional, apesar di su poblacion chikito.
Actualmente, na Aruba 1 di cada 5 habitante ta un persona refugia, un cifra cu ta keda solamente abou di Lebanon (cu 1 di cada 6 habitante).
Siguiendo Aruba den e lista di hostnan ta haya paisnan manera Curaçao (cu 1 di cada 12 persona), Chad (cu 1 di cada 15), y Jordan (cu 1 di cada 16).
Segun UNHCR, e aumento den cantidad di persona cu a busca refugio den region Caribe, specialmente riba Aruba y Curaçao, ta lanta preocupacion riba sostenibilidad y e capacidad di e islanan chikito pa sigui duna support na e comunidadnan vulnerabel. E rapport ta enfatiza e importancia di sosten global pa asisti e paisnan den maneho di e reto aki creciente di desplazamento forzoso.
E informacion cu UNHCR ta duna ta mustra e gran desafio cu diferente pais ta enfrenta pa adapta y asisti e poblacionnan desplasa, y e necesidad pa sosten y cooperacion internacional pa asegura cu tur refugiado y persona desplasa ta haya proteccion y seguridad na e paisnan unda nan a haya refugio.
{gallery}Aruba ta un di e paisnan cu mas refugiado na mundo, segun rapport di UNHCR{/gallery}
