Pueblo di Aruba tambe ta feliz
ORANJESTAD (AAN): Manera cu a wordo publica siman pasa caba riba paginanan internacional rond mundo, hecho ta cu danki na decision di Papa Francisco, awor si e tan stima Dr. José Gregorio Hernández ta bira e prome santo venezolano. Un momento di felicidad no djis pa pueblo di Venezuela, sino pa su gran y fiel fanaticonan tambe na Aruba.
E anuncio aki a ocasiona hopi alegria y felicidad, cu Papa Francisco a aproba e votonan faborabel pa e Sesion Ordinario di Pastoor, Cardenalnan y Obisponan di e Dicasterio pa Causa di Santonan pa e canonizacion di e beato venezolano José Gregorio Hernández Cisneros.
Papa a dicidi pa yama den lunanan venidero un consistorio di Cardenalnan cu ta trata entre otro e puntonan di canonizacion di otro beatonan den cual lo bay stipula e fechanan. E informacion aki a wordo publica den e boletin di Oficina di Prensa di Vaticano dia 25 di Februari 2025.
E acontecimento historico aki, cu a wordo spera masha hopi mes pa pueblo venezolano y tambe na Aruba, ta un reconocemento pa e bida ehemplar y e virtudnan heroico di un homber kende a dedica su existencia pa alivia e sufrimento humano y transmiti un mensahe di amor y speranza. Iglesia Catolico ta reconoce su bida di santidad, acompaña pa un debocion universal, cu awor ta ser permiti pa e wordo hisa pa altar.
Un proceso historico: E canonizacion di José Gregorio Hernández ta un etapa historico pa su pueblo y pa Iglesia Catolico. Ta trata di e prome santo venezolano proclama pa Iglesia Catolico Universal. Su Causa pa Santidad a cuminza un poco despues di su morto na 1949, ora cu Monseigneur Lucas Guillermo Castillo tabata Arzobispo di Caracas, y a pasa pa diferente etapa mientras añanan a pasa. Na 1986, Papa Juan Pablo II a declar’e ‘Venerable’, reconociendo su virtudnan heroico. Na 2020, Papa Francisco a aproba un milagro atribui na su trabao, loke a habri caminda pa e wordo beatifica na April 2021.
Finalmente awor dia 25 di Februari 2025, Papa Francisco a aproba e voto positivo pa su canonizacion, y e fecha pa esey lo wordo duna aki algun luna.
Diferente persona a acompañ’e den e proceso aki, principalmente e Cardenalnan Baltazar Enrique Porras Cardozo y Jorge Liberato Urosa Savino, kendenan a keda pusha pa esaki grandemente. Tambe tin diferente postulador y vice-postulador pa esaki, entre cual ta destaca Dr. Silvia Correale, tambe P. Gerardino Barracchini, Monseigneur Tulio Ramirez Padilla, y Monseigneur Fernando Jose Castro Aguayo.
Bida y obra di un Santo: Dr. José Gregorio Hernández a nace na Isnotú na estado Trujillo dia 26 October 1864. For di hoben el a demostra un gran inteligencia y un vocacion profundo pa duna servicio. El a gradua como docter na Universidad Central di Venezuela, y a bay specializa na Paris, unda el a destaca pa su excelencia academico y su compromiso social.
Ora el a regresa Venezuela, el a traha cu yen pasion como Docter, y a entrega su servicio specialmente na esnan mas pober y esnan menos afortuna. Su consultorio a bira den un refugio pa esnan cu no tin recurso pa por a haya yudansa medico. Dr. José Gregorio Hernández no solamente tabata cura hendenan malo, sino tambe tabata duna consuelo spiritual y apoyo emocional na su pashentnan.
Ademas di su trabao como medico, Dr. José Gregorio Hernández tabata un homber di profundo fe catolico. Su religiosidad a rondona su bida y su trabao, y el a demostra semper su amor pa prohimo y su dedicacion na esnan mas den necesidad.
Desde su morto na 1919, Dr. José Gregorio Hernández a converti den un figura iconico na Venezuela y rond mundo. Su fielnan tabata haci oracion pe enbusca di sana nan mes.
Su bida y su obra ta un ehemplo di amor na prohimo, di entrega su mes na otronan y di hopi fe den Dios. Su legado a keda biba den curazon di esnan cu tabata vener’e, y di esnan cu a ricibi e milagronan di Dios bao su intercesion.
Dr. José Gregorio Hernández ta un santo pa e tempo aki, un modelo di laico cristian cu ta invita tur hende pa biba e fe cu alegria y compromiso, y pone na servicio di otronan, tur nos talento y capacidadnan.
E canonizacion di José Gregorio Hernández ta motibo di celebracion pa tur hende.
Opinion di Papa Francisco: A bin sali na cla, cu Papa Francisco a aproba e decreto pa e canonizacion di e beato venezolano José Gregorio Hernández Cisneros. El a haci esey mientras e tabata hospitaliza den Hospital Gemelli na Roma, debi na pulmonia bilateral, segun Vaticano a informa.
Francisco a firma e decreto durante e bishita cu Secretario di Estado Vaticano, Pietro Parolin a haci cerca dje, acompaña pa Secretario Interino di Estado, e venezolano Edgar Peña Parra.
Dr. José Gregorio Hernández conoci como e “Docter di Pobernan” (1864-1919) a wordo beatifica dia 30 di April 2021 na Caracas.
Papa Francisco a yega di papia di e figura di José Gregorio Hernández despues di e beatificacion: “E tabata un docter yena di ciencia y di fe y tabata por a reconoce den esnan cu malesa e cara di Cristo. Como bon samaritano, el tabata yuda nan cu caridad evangelico,” e pontifice a declara despues di e rezo di Regina Coeli dia 2 di Mei 2021.
E ceremonia di beatificacion tabata uno chikito, cumpliendo cu medidanan di seguridad y salubridad publico cu tabata valido e tempo ey pa cu e pandemia, y solamente 150 persona tabata presente. E beatificacion a bira posibel despues cu Francisco a reconoce e milagro cu Dr. José Gregorio Hernández a duna na e mucha muher Yaxury Solórzano Ortega. El a ricibi un tiro den cabez durante un atraco mientras e tabata cu su tata. Docternan cu a atende a bisa cu por haci nada mas pa e mucha muher. Esey a socede na Maart 2017 na estado Guarico, ora e mucha muher tabatin 10 aña. Despues cu e docternan a bay bisa e mayornan cu e mucha muher ta bay muri, su mama a haci oracion na Dr. José Gregorio Hernández pa e wordo cura. Pa e motibo aki, segun e version di famianan, y confirma pa Papa, e mucha muher a salba.
E Docter di Pobernan, un medico cu a combina su conocementonan cientifico y su fe grandi pa religion durante su 54 aña di bida, semper a wordo hopi respeta na Venezuela. Na dje nan ta atribui miles di milagro, y solamente esun di e mucha muher aki a wordo reconoci door di Vaticano. E popularidad y cariño entre e ciudadanonan, cu despues di su morto a cuminza vener’e y yame santo, a cuminza desde cu e tabata hopi hoben, debi na e generosidad cu cual semper el a actua.
E Docter a fayece na Caracas dia 29 di Juni 1919 ora un vehiculo a dal’e, y den e caida el a fractura su craneo ora cu el a dal duro contra un acera.
Na su entiero miles di hende tabata presente, y e sero principal di Caracas, conoci como ‘Avila’, a keda sin flor despues cu tur a wordo corta pa wordo hiba pa e Docter, y su caha di morto mes a wordo carga den braza door di ciudadanonan di pueblo.
