ORANJESTAD (AAN): Den un pasado no mucho tempo atras, ta casi tur cas na Aruba tabatin un mata di Lamunchi ta crece.
Esaki ta algo cu tabata placentero pa mira! Pesey semper na hopi cas ta tur dia bo por haya canica grandi cu Juice di Lamunchi den dje ta fria pa famia bebe di dje. Casi no mester bay Supermarket cumpra Lamunchi, pasobra na bo cas, of na cas di bisiña, of na cas di wela mes bo por haya cumpra.
Pero alrededor di 20 pa 25 aña pasa, un malesa di mata a casi elimina tur mata di Lamunchi cu tabatin planta rond di Aruba. Ni maske kico a haci, nan a perde tur nan blachi y e tempo ey asina nan a muri.
Pero awor Santa Rosa kier pa pueblo cuminza planta Mata di Lamunchi crioyo bek. Siman pasa nan a anuncia cu nan tin Lamunchi den potchi na benta.
Por pasa entre 7:30 am y 2:30 pm pa cumpra. Ban planta Lamunchi bek manera nos grandi nan tabata hasi pa por traha juice, usa den cushina of cu te ora di griep. Corda warda tur simiya pa boso por replanta despues of trece nan pa Santa Rosa por planta mas.
