Fundacion Movimento ta Bida ta organiza un 'song festival' di adulto mayor sigui pa fiesta bailabel

Dia 12 di November proximo na Renaissance Ballroom:

ORANJESTAD (AAN) – Harold de Miranda, di Fundacion Movimento ta Bida, den entrevista cu DIARIO, a anuncia un evento cu ta cuminza cu un 'song festival' na Papiamento, cu lo tuma lugar diadomingo 12 di November, desde 4’or di atardi, na Renaissance Ballroom y lo caba anochi 11’or cu musica di añanan 60 pa 80.

            El a informa cu adultonan mayor (hende  homber y hende muher), kiermen 60 plussers ta bay interpreta canticanan di Pasco, tanto di antes como esnan nobo, pa hinca e ambiente di Pasco caba na November.

            Nan tur ta wordo acompaña pa e banda grandi “Nos cu Nos”, bao direccion di señor Roy Sneek, musico y pianista.

            De Miranda a agrega cu despues di e 'song festival', nan lo cambia e ambiente completo y ta bay bek den ambiente di añanan 60, 70, 80 unda cu cuater banda lo bay toca y lo sigui te cu 11’or di anochi.      El a menciona cu esaki ta e fiesta di mas grandi cu tin na Aruba, pasobra e lo ta siete ora en total. Tur hende ta bon bini, y prijs di entrada ta masha abao mes, segun Harold de Miranda a indica. E ta gradici UNOCA cu ta sponsor tambe pa e Fundacion por presenta e 'song festival' aki.

            Fundacion Movimento ta Bida semper ta wordo bisa cu balia ta un terapia, mescos cu cantamento ta hopi bon pa hende grandi, pa nan pulmonnan, etc.

            Fuera di esey e ta un momento social tambe, pasobra nan ta topa otro, ta combersa, etc. Ya caba e grandinan cu ta canta ta bezig pa cuater siman caba, cu ta entrena cu e banda, hunto cu Roy Sneek. E evento aki cu Movimento ta bida ta organiza, ta combina e parti social cu accion, de Miranda a subraya.