E tabata un sostenedor ferviente di e lucha Arubano pa Status Aparte
ORANJESTAD(AAN)- Tabata Diamars cu Bonaire a wordo informa cu Jopie Abraham a fayece. E noticia a plama den Reino Hulandes, caminda Jopie Abraham a skirbi su propio historia como politico critico.
Jopie Abraham a nace na Bonaire como yiu di Julio Abahram, kende tabata fundador di Partido Democratico di Bonaire, cu tabata parti di e cadena di partido Partido Democraat di Curacao, PPA di Aruba, Partido Democraat di Bonaire y Partido Democraat di Isla Ariba.
Un accidente tragico a conduci na morto di Julio Abraham, kende a sirbi Bonaire como politico na nivel local y di Antia Hulandes.
E partido a haci un apelacion riba su yiu homber, Toon Abraham, pa tuma e encargo di dirigente di DP Bonaire y den e funcionnan gubernamental di e isla y Antia Hulandes.
Ta den e tempo aki, Bonaire a conoce un desaroyo economico importante.
Ta como sucesor di su ruman homber, Jopie Abraham a drenta arena politico di Bonaire cu un estilo propio, cu a haci cu el a bira hopi popular pero tambe na cierto momentonan hopi controversial na e isla cu pa hopi tempo a conoce dos partido cu tabata DP y UPB, cu tabata wordo dirigi dor di Rudy Ellis, kende tabata esposo di ruman di Toon y Jopie Abraham.
Tabata e desaroyonan riba tereno estatal, cu a crea un lazo estrecho entre Jopie Abraham y Betico Croes.
Jopie Abraham tabata kere den e formula di Status Aparte pa Bonaire drenta un futuro nobo den cual e autonomia di e pais mester a garantisa cambionan na fabor di e isla.
E conviccion aki a conduci na un relacion estrecho entre Jopie Abraham y Betico Croes, loke a resalta den e relacionnan den Reino.
Sinembargo, Bonaire a sigui un rumbo diferente di Aruba for di 2006 ora a logra un prome acuerdo pa Bonaire bay resorta directamente bou Hulanda, loke a wordo realisa na 2010.
Actualmente e yiu di Jopie Abahram, Clark Abraham, ta dirigi e partido cu a wordo funda dor di su welo.
