Ban yuda muchanan y MVTBV - ORANJESTAD (AAN): E organizacion local cu ta dunando yudanza masha hopi mes ultimo temponan, esta Mi Voz Ta Bo Voz (MVTBV),
a indica na DIARIO cu awe Diahuebs 19 di Augustus nan lo bay tin un ‘School Supplies Drive’.
Debi na e decision di Gobierno riba e cambio di fecha pa aña escolar 2021, esnan di MVTBV lo extende nan proyecto di Back 2 School te cu 27 di Augustus 2021. E motibo di esaki ta pa logra yega na nan meta di yuda por lo menos 500 mucha e aña aki.
Pa esaki nos lo ta bay tin un evento mas di 'School Supplies Drive'. Esaki ta pa nan colecta articulonan di scol como tambe por "Adopt a Child" of por haci donacion di placa cash.
Esaki lo tuma lugar Diahuebs 19 di Juli 2021 na Engelandstraat 11 na Aruba Lions Club, desde 4:00 pm te cu 6:30 pm, pues den oranan di atardi.
Riba e fecha aki bo por entrega articulonan di school manera rugtas, etui, gum, slijper, sker, lijm, schrift, snelhechters, liniaal, white-out, kleurpotlood, stift of highlighters.
E organizacion di MVTBV ta spera cu pueblo por duna un man, pa asina muchanan di scol por cuminza lesnan bek cu suficiente material pa nan usa den klas.
