Jonathan Hans Maduro di Stichting Tio Duque hopi contento di a brinda un Cena di Pasco na muchanan

“Pone sonrisa riba cara di un mucha ta lo mas bunita cu tin”

ORANJESTAD (AAN) – Jonathan Hans Maduro, presidente di e Fundacion Cas di Tio Duque, na Hulanda, a duna di conoce den entrevista cu DIARIO cu, pa motibo cu e tin pensa di keda un tempo largo na Aruba, el a dicidi di haci e trabao cu e ta realiza na Hulanda, aki na Aruba.

Maduro a splica cu Stichting Tio Duque, ta un instancia cu ta organiza dos bez pa aña dos evento: uno ta back to school y e otro ta un Cena di Pasco, dirigi na muchanan di menos recurso.

El a menciona cu el a bin cu vacacion na Juni, pero debi na enfermedad di su mama, el a dicidi di keda pa tempo indefini, y e no sa ki tempo e lo bolbe Hulanda.

Ta asina cu, den corto tempo, Jonathan a logra di lanta un comision y nan a cuminza traha y busca muchanan di menos recurso, mamanan cu ta biba di onderstand, pa haci algo bunita pa nan y asina aki a organiza un Cena di Pasco.

Pa locual ta financiamento, despues di a combersa cu algun hende local, cu a informe tocante CEDE Aruba, for di cual el a ricibi un bon ayudo cu el a gradici hopi, no obstante no tabata suficiente pa cubri tur e gastonan, anto a organiza fundraising pa haya un tiki mas di cent, ademas nan a busca sponsor pero a topa cu hopi dificultad, no a bay nada facil, cu excepcion di cuater lugar cu a sponsor e actividad.

Jonathan a comenta cu el a invita prensa pa ser conoci cu Fundacion Tio Duque, pasobra ora a busca sponsors hopi a bise cu nan no conoce su persona, ademas cu su KvK ta di Hulanda, como tambe su cuenta di banco, y tur esaki a hunga un rol hacie mas dificil.

E plan teynan pasobra e kier sigui haci e trabao aki, pasobra esey e gusta y e kier sa cu e tey pa e aña escolar nobo, cu e kier organiza e Back to School y ta spera cu e por conta mas riba e pueblo di Aruba, esta comerciantenan y sponsor cu mira e causa cu ta masha bunita. “Pone sonrisa riba cara di un mucha ta e cos di mas bunita cu tin” Jonathan Hans Maduro, presidente di e Fundacion a conclui.