JOIA by Iberostar tin algun Suites cu piscina semi-priva na nan balcon

ORANJESTAD (AAN): Diaranson tin soft opening di JOIA by Iberostar na Eagle Beach, y manera ta conoci e mentalidad di gerencia,

cu awor ta trata di inclui e pensamento aki cerca tur empleadonan... ta algo cu e compania corporativo di Iberostar a bin ta plantando na tur su resortnan rond mundo.

   Nan ta un di e prome resortnan na mundo cu a prohibi uso di saco di plastico di un solo uso, y tambe di trempan a inspira tur hotel pa nan bin cu turismo responsabel cu ta proteha oceanonan.  Pesey cada aña, hotelnan di Iberostar tin di traha un rapport pa splica kico nan a logra haci e aña ey pa ta haciendo un operacion mas sostenibel.

   Nan ta enfatisa e meta pa sigui reduci e ‘carbon footprint’, cumpra seafood cu ta wordo captura na un forma responsabel, y mehora e sistema di medio ambiente cu ta rondona nan propiedadnan.

   E nomber cu Iberostar ta uza pa e proceso aki ta ‘Wave of Change’, y ta pionero den e forma con gerencia ta traha pa trata na cuida nan lugar y dirigi esaki rumbo pa un economia circular.

   For di combersacion cu a hiba cu Director General Arnaud Le Lanchon, e resort na Aruba lo bay sigui tur e trend ey tambe.  Es mas nan kier hasta envolvi scolnan di Aruba den e meta di concientiza tur hende pa keda cu e mesun pensamento di cuida medio ambiente.

    Gerente di comunicacion Ghislaine de Windt Kemmerling a indica cu hasta prome cu Iberostar a habri mes na Aruba, nan tabata envolvi scolnan caba riba e aspecto aki.  Es mas, den pasado a yega di manda grupo di alumno di Colegio EPI bay core stage na un Iberostar na Mexico, y tambe na un otro na Jamaica.  Iberostar a core cu tur gasto di esey.

   Fuera di esey, den e mesun edificio di e Hotel nobo aki, ta creando un lokaal di les unda scolnan por bay eynan pa asina haya educacion special riba proteccion di bida marino den Caribe, y mucho mas.

   Algo cu a ripara di awor caba ta cu e empleadonan cu DIARIO a topa cune durante e recorido, ta tur tin sonrisa riba nan cara y ta indicativo cu nan ta cla pa e soft opening algun dia prome cu Pasco.

   Fenomenal ta e suites aki cu tin na Iberostar, unda cada camber tin un piscina na rand di nan balcon.  Ademas e ta habri di forma cu por hiba combersacion ameno cu bisiñanan, y e piscina ta interconecta cu otro.

   Tin otro Suites cu tin jacuzzi grandi priva den nan camber, y manera cu gerente di mercadeo Rudolfo Dirksz ta mustra aki, por a mira cu e decor na muraya den camber ta di e famoso ‘Parrot Fish’ di Aruba, y den un color liviano por hasta mira e mapa di Aruba imprimi den dje.