John Fun a duna un presentacion na Aruba Lions Club

Fundacion Ban Uni Man pa Cria Nos Muchanan

ORANJESTAD (AAN): Recientemente durante e ultimo Aruba Lions Club su club meeting di dia 29 juli e guest speaker tabata sr. John Fun representando e Fundacion Ban Uni Man pa Cria Nos Muchanan (FBCNM) E fundacion aki a ricibi un donacion for Aruba Lions Club pa nan trabao di yudansa pa studiantenan di scol basico.

   Esaki ta den cuadro di un di e Global causes di LCI cu ta Hunger Relief cause. Di e forma aki Aruba Lions Club tambe ta duna su aporte pa yuda 5 biaha pa siman cu desayuno pa mas di 750 mucha cu ta bayendo scol.

   Despues di e presentacion sr. Fun a ricibi e cheque simbolico for di man di e actual presidente Lion Gerardo Figaroa.

   Pa e siguiente club meeting dia 26 di Augustus e guest speaker lo ta un representante di Fundacion Pa Nos Comunidad cu lo duna un presentacion na miembronan di e club. Aruba Lions Club ta un club di servicio cu pa casi 80 aña caba ta trahando pa e comunidad di Aruba y ta bao di auspicio di Lions Club Internacional cu ta consisti di mas cu 46 mil club den mas di 200 pais y ta conta cu mas di 1.4 miyon miembro rond mundo y a cumpli 109 aña di existencia cu ta hacie e organizacion di servicio mas bieu y mas grandi mundialmente.

   Por ultimo Aruba Lions Club ta compromote su mes pa sigui traha hunto cu su partnernan pa yuda mehora e calidad di bida di e pueblo pa medio di su diferente programa di servicio manera esun di Hospital Bed y Wheel Chair, Smile Mobile, Feria di Salud, bek to School Food Bags. Ta pidi pa pueblo keda pendiente pa Aruba Lions Club su siguiente actividad.