ORANJESTAD (AAN) – Pa algun aña caba Camara di Comercio y Industria di Aruba (KvK) ta duna su espacio na nos artistanan local y brinda nan e oportunidad di expone nan bunita creacionnan.
Arte ta bin di inspiracion y ta stimula of por inspira otro tambe. E ta forma parti di e identidad di un persona, su cultura y pais. E biaha aki ta toca turno na Fundacion Crea Arte Aruba pa expone arte di su miembronan, e directora y artista Sra. Miriam de L’Isle y alabes embeyece e murayanan den e area di recepcion di KvK.
Diabierna 22 di october pa 5’or di atardi KvK ta inaugura e exposicion oficialmente. Comunidad completo ta keda invita pa e inauguracion. Ariba e dia di inauguracion por admira e obranan den bon ambiente hunto cu un bebida y algun pasaboca. E obranan lo keda colga pa publico por pasa admira nan durante un periodo di un aña. Anteriormente KvK a expone obranan di sra. Rani Varde.
Pa e edicion aki KvK a brinda e oportunidad na un Fundacion pa asina promove e tipo di organisacionnan aki cu ta dedica na educa muchanan desde un edad chikito ariba e importancia di arte.
Fundacion Crea Arte a wordo funda na aña 2015 cu e obhetivo principal pa educa y desaroya e conocimiento artistico y aprecio pa arte den comunidad local, cu ta focus especialmente riba muchanan desde 6 aña y teenagers. Lesnan di arte ta wordo duna parti atardi den siman y riba diasabra mainta.
Proyectonan special y actividadnan durante vakantie tambe ta parti di e curriculum. Fundacion Crea Arte ta desaroya plan di lesnan special y metodonan di enseñansa cu e meta pa stimula e talento artistico di cada alumno. Un biaha pa aña ta organisa un exposicion di arte pa showcase obra di e studiantenan.
Por mira mas di e obranan via e pagina di facebook Fundacion Crea Arte Aruba.
KvK ta gradici sra. Miriam de L’isle pa participa na KvK su exposicion di arte anual y expone su obra y di e alumnonan di Fundacion Crea Arte den e edificio di KvK. Reglanan di DVG ta keda aplicabel.
Un invitacion cordial ta bay pa un y tur pa pasa libremente durante orario di oficina, di dialuna pa diabierna, entre 8:00 AM y 4:30 PM pa admira e diferente obranan di arte.
