Jennifer Arends-Reyes ta destaca colaboracion y sostenibilidad durante bishita inaugural di Legend of the Seas

Jennifer Arends-Reyes ta destaca colaboracion y sostenibilidad durante bishita inaugural di Legend of the Seas

ORANJESTAD (AAN): Parlamentario Jennifer J. Arends-Reyes, presidente di Comision di Turismo di Parlamento,

a participa den e programa oficial pa conmemora e bishita inaugural di Legend of the Seas na Aruba. E encuentro a reuni representantenan di Royal Caribbean Group, autoridadnan local y partnernan di sector turistico pa marca e ocasion y intercambia perspectiva tocante turismo crucero y su conexion cu economia, comunidad y ambiente.

Durante e programa, Arends-Reyes, hunto cu su colega parlamentario Clifford Heyliger, a participa den e protocol oficial y e intercambio tradicional di plakkaat cu ta marca e prome bishita di e barco na nos isla.

E programa a inclui tambe un tour ambiental di e barco y un ceremonia di donacion comunitario. Como parti di e iniciativa Giving Back to the Community di Royal Caribbean Group, Scubble Bubbles y Turtuga Aruba a ricibi donacion pa apoya nan labor relaciona cu proteccion di ambiente marino y conservacion di naturalesa.

Arends-Reyes a destaca e importancia di e apoyo aki pa organizacionnan local cu ta contribui na cuido di e patrimonio natural di Aruba. Segun e parlamentario, e relacion entre turismo y comunidad ta ofrece oportunidad pa impulsa iniciativanan cu tin un impacto positivo riba nos isla.

Como presidente di Comision di Turismo, Arends-Reyes ta sigui e desaroyonan den e sector y e manera cu turismo crucero ta contribui na e economia y ta relaciona cu e bienestar di comunidad. E bishita a brinda oportunidad pa conoce mas di e barco y intercambia idea cu representantenan di Royal Caribbean Group y otro partnernan. “Nos turismo ta un di e pilarnan importante di Aruba. P’esey, nos mester sigui tene un dialogo habri cu e companianan y e diferente partnernan den e sector. E tipo di encuentro aki ta un oportunidad pa conoce otro, comparti perspectiva y sigui fortifica e colaboracion,” Arends-Reyes a expresa.

Den e intercambionan, atencion a bay na e papel di Aruba como destinacion di crucero, e importancia di cooperacion entre sector publico y priva, y e contribucion cu actividadnan turistico por haci na iniciativanan comunitario y ambiental.

Arends-Reyes a resalta cu desaroyo turistico mester sigui bay hunto cu sostenibilidad y atencion pa bienestar di nos comunidad. E a subraya cu proteccion di costa y bida marino ta un responsabilidad comparti, den cual organizacionnan local tin un papel esencial pa sigui crea conscientisacion y promove accion concreto.