FADA ta cla pa sigui promove “Bo Amigo Responsabel” (BAR) pa Carnaval

FADA ta cla pa sigui promove “Bo Amigo Responsabel” (BAR) pa Carnaval

Rulienne Arends ta informa:

  • Presentacion di mas video ta na caminda 

ORANJESTAD (AAN)- Rulienne Arends, Trahado Preventivo di Fundacion Anti Droga Aruba (FADA), a elabora den entrevista cu DIARIO, tocante nan campaña “Bo Amigo Responsabel” (BAR). El a bisa cu nan tin, tras di lomba, varios video cu FADA a comparti riba su Plataforma Social, y ta bay sigui e temporada aki.

   Videonan unda personanan ta conta nan historia cu a perde famianan pa motibo di accidente causa pa otro persona bao influencia; companianan di seguro tambe a conta di nan parti, y tambe di e parti forensic. “E videonan aki ta bay sigui na luna di November, y tin mas historianan cortico di famianan cu a perde sernan keri, y cu ta conta nan historia y cu tambe tin mensahe pa comunidad. Nos ta preparando un video cu semper nos tabata conoci p’e, nos ta lanzando esaki pronto pa comunidad, pa full December cu ta drentando, eigenlijk, e temporada di carnaval”, Rulienne a duna di conoce.

   El a agrega cu pa loke ta carnaval FADA tin algun plan cu BAR, mirando cu carnaval for di November tin evento caba, pesey tambe e push y un tras di otro nan ta bay ta saliendo. “Di parti di FADA nos ta bay haci e parti di concientizacion, pero e ta keda na cada ken pa ta responsabel tambe pa tuma e miho decision. Ta hopi facil pa nos punta dede riba fundacionnan, pero nos tin cu para keto tambe y wak ki dia abo, ta bay tuma e responsabilidad. Si bo ta bay consumi alcohol, nos no ta bisando cu no mag, eigenlijk bo sa con hopi bo ta bay bebe y, den e caso aki, busca un amigo responsabel.

  E no ta dificil pa bo puntra un amigo, un famia ‘hey, bo ta bayendo e mesun caminda cu mi, ki hubo abo no bebe awe, of bo por bin busca mi tal ora?’ E ta hopi facil pa nos por yuda di e banda aki, pero di parti di FADA, si tur cos ta bon ya e otro siman nos por wak e videonan aki”, Rulienne Arends, Trahado Preventivo di FADA a informa.