Rosa Leon, Presidente Stichting Mantelzorg Aruba:
*E cuidador aki mester di guia y sosten
ORANJESTAD (AAN); Rosa Leon, presidente di Stichting Mantelzorg Aruba, den entrevista cu DIARIO a splica cu esaki ta un trabao boluntario, unda un cuidador informal ta yuda otro hende cu mester, draai su dia-dia.
El splica cu e meta di Stichting Mantelzorg ta duna guia y sosten na e cuidador informal, na Aruba. Kiermen, Mantelzorg ta esun cu ta duna cuido na un otro persona cu mester di esey.
“Aworaki 9% di e populacion total ta duna mantelzorg, of cuido informal na un ser keri, bisiña of conoci. Aworaki no ta un misterio cu mantelzorg ta hungando un rol na henter mundo, y e dunadornan di cuido aki na Aruba, no tin un unda nan por bay bisa cu nan mester un sosten y guia pa e cuido cu nan ta duna. Corda cu mayoria di nan ta dunando 8 ora di cuido informal na un persona. Nan mester un momento di descanso y cu otro hende duna nan guia con nan por haci’e miho.”
El a sigui bisa: “Mayoria di mantelzorg ta bira cuidador sin cu nan mes kier, nan ta djis yega na porta unda tin mester y duna esaki, y nos ta ripara cu hopi hende mester di e guia aki pa por duna un miho servicio na cas.”
Rosa a indica cu e Stichting por papia di cual ta nan dolor y nan deseo di wordo yuda, y su meta aworaki ta pa busca e mantelzorgnan cu tin eyfo, y esnan cu no ta registra, pasobra e cifranan cu tin ta data di aña 2020, pues ya tin cuater aña di ‘spelling’ y mester sa cuanto e cantidad a crece y kico ta nan necesidad pa por duna nan e ayudo.
“Mi ta kere cu nos falta mas comprension di un pa otro y tambe e aceptacion, pasobra tumando e trabao di un mantelzorg pa duna cuido na otro persona, e no ta facil mirando cu nos no ta papia di dje tampoco. Y tin hopi frustracion paden ora bo duna cuido na otro persona si bo no tin e hermentnan necesario, esey ta haci cu bo trabao ta bira hopi mas duro, pa por dun’e na e persona aki”, Rosa Leon a subraya.
El a remarca cu esaki ta un trabao boluntario. Kiermen, sin wordo paga. “E ta algo cu nos no tin e conocimento di dje tampoco. Nos por bisa cu si nos tin cu duna cuido na nos mayor, asina mester ta. Mi ta haciendo e trabao aki pasobra mi mester, como casa, como yiu, como pareha. Nos mester categoriza kico ta e importancia di mantelzorg, y awor den casnan di cuido no tin suficiente lugar, pues ta keda na e familiarnan cu ta esnan cu ta duna esaki, y si nos no tin e apoyo den e comunidad e trabao ta bay dura hopi mas pisa”, segun Rosa Leon, Presidente di e Stichting a relata.
