Jennely Winklaar ta buscando 200 hende pa aparece riba un video cortico

Reto pa participa den certamen internacional

 *E ta casi cla pa bay El Salvador pa representa e isla 

ORANJESTAD (AAN): Miss Youth Aruba 2024, esta Jennely Winklaar ta den completo preparacion pa participa aki algun siman na un certamen na El Salvador.

   E ta bayendo ciudad di San Salvador pa participa den e certamen di ‘Miss Teen Mundial 2025’.  El a splica cu e ta sinti su mes hopi agradecido y hopi honra di por representa Aruba internacionalmente.  Semper esey tabata un deseo di dje, y nunca el a pensa cu e lo bay ta di e forma aki.

   Segun Jennely, e preparacion no tabata hopi facil, pero toch a haci tur loke nan tabata por pa haci esaki un realidad.  “Nos a pone nos mente na dje, y nos a percura pa logra tur loke a bin nos dilanti,” ta loke e representante di Aruba a indica.

   Ademas di esey, Jennely a splica cu e ta viahando pa El Salvador, unda nan lo bay topa cu un candidata procedente di Aruba cu ta bin bon prepara, y lo bay representa e isla lo mas cu nan por y ta anhela pa esnan di El Salvador mira con nan di Aruba lo bay luci.

   Jennely a manda gradicimento na tur esnan cu di prome dia a sostene y yud’e for di ora cu na 2024 el a dicidi pa participa na Miss Youth.  El a gradici Pierreson Thielman kende a haci su obra di arte riba su makeup, danki na Alan di K’Lan Beauty Solutions kende a tuma e reto pa viaha cu nan pa El Salvador, y tambe na Robin Croes Ponson y tambe Michael kendenan a sostene.

   Buscando 200 hende: Pa e certamen na El Salvador, e certamen a presenta cu un reto pa tur candidata.  Jennely a haya sa cu e tin di traha un short video, riba cual tin por lo menos 200 persona local boluntario riba dje.

   E video aki lo bay sirbi como acumulacion di punto, pa asina mira cual candidata pa Miss Teen Mundial 2025 lo bay cay den e Top 15.  Pa tal motibo e mester di 200 persona di Aruba pa acepta e reto aki hunto cu ne.

   E lo avisa riba social media, e fecha, horario, y lugar unda tur 200 persona ta ser pidi pa presenta pa e video.  Por busca “Miss Teen Mundial Aruba 2025” tanto Facebook como Instagram.

  DIARIO ta spera cu publico lo sa di sostene Jennely, kende tin asina hopi gana di duna un bon representacion di Aruba den exterior.  Asina tin di sigui sostene e candidatanan local cu ta viaha pa exterior buscando forma pa bin cu e corona maximo.