Jeanique de Palm a sali pa Bolivia pa representa Aruba na Reina Hispanoamericana 2021

ORANJESTAD (AAN): Diahuebs mainta, Aruba su representante na e certamen internacional Reina Hispanoamericana 2021, Jeanique de Palm, di 28 aña di edad a sali rumbo pa Bolivia pa representa Aruba.

   Despues cu na Januari di e aña aki Comishon Reina Hispanoamericana Aruba, bou direccion di Endy Croes a apunta Jeanique como Aruba su representante, Jeanique a cuminsa move y prepara di biaha.

   Un preparacion extenso bou guia di diferente profesional na Aruba a concentra riba Public Speaking, Personal Branding, Pasarela, Les di Makeup y Cabey y training fisico. Awe Jeanique ta sinti su mes hopi sigur di e trabao cu e lo bay desplega na Bolivia.

   E certamen cu e aña aki ta celebrando nan di 30 edicion, ta conta cu 33 candidata for di diferente parti di mundo. Den e programa di e certamen a inclui bishita na 4 ciudad di Bolivia, unda cu e candidatanan lo biaha den Bolivia mes pa atende diferente actividad publico y comercial. E anochi final lo ta Diasabra dia 30 di October 2021 pa 10’or di anochi.

   DIARIO ta desea Jeanique hopi exito y lo sigui su pasonan di cerca.