ORANJESTAD (AAN): E siman aki Post Aruba N.V. a emiti su prome stampia pa 2021 den formato di un souvenir vel.
E emision aki a worde yama “Fofoti” y a worde diseña pa Armando Goedgedrag.
Fofoti ta un mangel di e genero Combretaceae. E specie aki a crece den regionnan tropical y sub tropical rond di mundo. E ta berde durante henter aña y ta crece den interior di un pais den tera firme, pero cerca di awa salo. Na ingles e ta worde yama “Buttonwood” door di e forma di su fruta, cu ta bruin y rondo manera un boton.
Un di e Fofotinan mas popular riba Aruba ta situa na Eagle Beach. E bunita bista di e lugar aki ta haci’e uno popular y ta worde uza hopi pa turista cu ta saca potret durante bahada di solo.
E forma particular di e Fofoti ta bin principalmente door di e biento constante cu ta supla di oost pa west. E mata aki ta brinda un bunita paisahe na nos beachnan. Por hay’e na mayoria parti di Aruba, pero e ta worde mira mas tanto den areanan di Malmok, Eagle Beach, Linear Park y Baby Beach. Tambe por haya nan cerca di mayoria rooi manera Rooi Prikichi, Rooi Canashito y na e Rooi na Sero Cristal.
Fofoti, mescos cu e otro mangelnan, ta worde protegi pa ley.
E souvenir vel aki tin un balor di 8,50 Florin y ta obtenibel na e oficinanan di Post Aruba, respectivamente na Oranjestad y San Nicolas.
E bunita serie aki no por falta den bo coleccion. Busca esun di bo awe mes, ya cu e cantidad ta limita.
