ORANJESTAD (AAN): Jeaninne Wong-Loi-Sing consehero di integridad serca Rijksdienst Caribisch Nederland, e siman aki a risibi e Premio di Integridad Ien Dales 2024.
Cada dos aña ta otorga e premio prestigioso aki na Hulanda na personanan cu ta haci un esfuerzo excepcional pa promove integridad den e sector publico. E premio ta carga nomber di ex-minister di Asuntonan Interno Ien Dales, un defensor di bon gobernacion publico y integridad.
Jeaninne Wong-Loi-Sing ta risibi e premio pa motibo di su esfuerso pa promove comportacion integro den Rijksdienst Caribisch Nederland. Su entusiasmo, profesionalismo, y e ehempel cu e ta pa otronan a impresiona e hurado. Su esfuerzo no solamente a promove un cultura di integridad den Rijksdienst, sino tambe den e comunidat mas amplio di Hulanda Caribense.
Modelo pa sigui na Hulanda Caribense: E entrega a tuma luga durante un encuentro di e Catedra Ien Dales, organiza pa e fundashon Stichting CAOP y Universidad di Leiden. Presidente di hurado Edith Snoeij aki a declara: “Jeaninne a demostra cu integridad no ta un meta di un solo biaha, sino algu cu bo ta traha riba dje cada dia. Su capasidad pa logra resultado concreto den un ambiente administrativo compleho, ta pone cu den e decada cu ta tras di lomba el a crece bira un modelo pa sigui na Hulanda Caribense.”
Integridad y colaboracion: E hurado tambe a elogia Jeaninne pa su colaboracion cu sindicato, mandatario, y colaborado den desaroyo di maneho di integridad. El a start un campaña pa plama e maneho aki bou di colaboradonan, y a lanta entrenamentonan tanto pa supervisor como colaborado. Ademas, Jeaninne Jeaninne Wong-Loi-Sing a lanta un oficina pa apoyo di integridad den e organizacion, di moda cu e topico aki a haya un cara reconosibel. Tambe, el a introduci un prosedura di keho y un sistema di persona di confianza, y el a organiza investigacionnan di satisfaccion bao di colaborado. Tabata discuti resultadonan di esaki cu directiva pa introduci mehoramento.
Tocante e Premio: Ta otorga e Premio di Integridad Ien Dales na personanan cu durante nan carera of na momento di eherce nan funshon ta demostra responsabilidad pa promove integridad den un ambiente administrativo y socialeconomico compleho. Tambe, nan mester por proba cu nan ta duna valor na un administracion publico cauteloso, y cu nan ta haci esfuerzo activamente pa combati iregularidad.
Por haya mas informacion tocante e Premio di Integridad Ien Dales y e raport completo di hurado riba e website di www.caop.nl
Nan esfuerso personal pa un organizacion integro, tanto como individuo y como team, a yama atencion positivo. E premio ta consisti di e imagen di brons ‘Noortje’, traha pa Anton Hoornweg, y un suma di placa pa promove integridad.
