Raymond Kamperveen a topa cu dificultad den Parlamento:
ORANJESTAD (AAN) Presidente di Parlamento, señor Raymond Kamperveen, den entrevista cu DIARIO tocante un reunion den Parlamento, tocante Ombudsman, a comenta cu Parlamentario Shailiny Tromp-Lee a bay cu vacacion desde dia 4 di October, y via un email Tromp-Lee a pidie cu si e ta bay pone fecha pa reunion p’e asisti, mester pon’e sea 3 di October of 15 di October pa dilanti.
Kamperveen a indica cu den e caso aki, el a agenda cierto reunionnan pasobra, eigenlijk, trabao ta sigui, pero el a tene cuenta cu e aspecto di dia 15. El a expresa cu e reunion t’asina importante cu e ta depende di e 21 parlamentarionan, pa pasa e ley.
“A pasa cu nos a tarda un poco, pasobra eigenlijk, e no a meld cerca mi. Mi a bay puntra e fraccion di MEP si nan por sa algo di dje, nan a bise cu nan no sa, pero ami mester a busca solucion. E orario a yega di 10 or y mey, y mi mester a hal e prome cu tur cos. Y despues tambe, mi mester a pidi e parlamentario cu tin mas input den Parlamento, cu ta señora Wyatt- Ras, y mi a pidie un fabor si e por a take over e parti di voorzitter, pa mi por a bay sinta na banda como voorzitter di CHA”, Presidente di Parlamento a splica.
El a sigui splica cu e reunion aki t’asina importante pasobra Parlamento tin un presupuesto pa Ombudsman cu mester wordo pasa pa 2024, pa e haya su fondonan pa, na prome lugar, cuminza traha y haya hende pa bin traha p’e, su mesun salario cu mester wordo pasa pa fin di October, y manera ta conoci, hopi biaha e proceso ta draai pa 15 di cada luna. Pa e motibo ey, Diabierna e mester a pasa caba, pero e ta lamenta cu politica ta wordo hunga eyden.
Kamperveen ta haya esey hopi jammer, aunke el a puntra fraccion di MEP si nan ta bay keda e no a haya contesta, cu excepcion di Parlamentario Vrolijk. Toch a logra haya quorum cu mas cu 11 hende, y e presupuesto a pasa, y esey ta importante y Ombudsman por cuminza traha, busca su hendenan pa traha, y duna informacion na pueblo, segun Presidente di Parlamento Raymond Kamperveen a indica.
