JCI Senators of Aruba a tene prome reunion di ESSAC

Reunion anual teni na Aruba

ORANJESTAD (AAN): E siman di 11 pa 17 di augustus 2024 ‘JCI Senators of Aruba’ tabata anfitrion di un grupo di JCI Senators, kendenan a bini Aruba specialmente pa lanta un organizacion nobo pa Senadornan di habla ingles, di Canada, Nort America (Merca) y Caribe, y a yama e evento ”1st Annual Celebration Reunion”.

   Junior Chamber International (JCI) ta un organizacion internacional pa hobennan entre e edad di 18 pa 40 aña, cu e meta pa desaroya e habilidadnan di liderazgo den e individuo aki. Esaki e organizacion ta haci door di duna e hobennan, training den diferente ramo manera: procedura parlamentario, con pa planea un proyecto, budgetering (traha presupuesto), presentacion den publico, presentacion di proyecto, protocol y etiquette di mesa, etc.

  Banda di e training e hoben ta haya e oportunidad pa pone den practica loke el a bin ta siña door di traha den proyectonan  y p’asina cumpli tambe cu e necesidad cu tin den nan comunidad, asumi responsabilidad den directiva, riba nivel local, nacional y internacional. Tambe JCI ta organiza durante un aña diferente actividad caminda e miembronan por bini hunto den un encuentro na un otro pais, asina topa cu miembronan di otro pais, intercambia idea y proyectonan, tuma curso riba nivel nacional y internacional y crea amistad nobo den mundo henter.

    JCI conoce tambe un miembro mas den e organizacion cu ta un ‘JCI Senator’. Un ‘JCI Senator’ ta un miembro cu a sobresali den e organizacion ora e tabata un miembro entre 18 pa 40 aña, y JCI Internacional ta dune un reconocimento pa bida largo, cu ta di bira un ‘JCI Senator’.  

    E Senadornan di area di Americas y Caribe a scoge Aruba pa durante e dianan 15,16 y 17 di Augustus 2024 bini hunto pa lanta un organizacion nobo, cual lo hiba e nomber di ‘English Speaking Senators of the Americas and the Caribbean’ (ESSAC). E organizacion a keda oficialmente lanta diasabra 17 di Augustus 2024 durante un Asamblea General cu a worde celebra den La Cabana Ballroom. E directiva pa ESSAC cu a keda eligi ta: Senadora Rudmila Smith-Paulo como Presidente, Tesorero Senador Lawrence Pitmann. Directora Senadora Ariel Jones, Directora Senadora Susan Geddes y Consehero General, Senador Steve Sutherland. E directiva eligi a worde instala den e Asamblea General na La Cabana Resort Aruba.  

    E miembronan cu a bishita Aruba a hospeda na ‘The Eagle Aruba Resort’ y tur tabata nan prome bishita na Aruba. E comite organizador a prepara un programa extensivo pa nan, caminda nan a haya e oportunidad di conoce mas di Aruba. A habri e evento cu ‘Opening Ceremony Dinner’, un tour rond di Aruba di Lighthouse te Baby Beach, un anochi Arubano cu dushi cuminda tipico di Aruba, baile ‘Dabaruida’ y musica tipico di ‘Flor di Montaňa’, un sailing tour riba Catamaran, un Asamblea General caminda a eligi un Directiva pa ESSAC y e evento a worde clausura den ballroom di Aruba Eagle Resort, cu un tremendo cena, show di Carnaval y a baile riba tononan di bon musica di DJ Metropolis henter anochi. Na e ocasion aki a reconoce 3 Arubiano como Miembro Honorario di ESSAC den persona di Vicky do Nascimento, Stanley Dabian y Roderick Hoek.

   E Senadornan bishitante a keda masha encanta cu Aruba su beachnan, su hospitalidad y su hendenan amabel y e bon cumindanan cu nan a ricibi.  E comite organizador a ricibi masha hopi palabra di elogio y bon comentario di cada un di e bishitantenan. Tin di nan a duna di conoce cu nan lo bolbe back Aruba cu nan famia. ESSAC y e Comite Organizador por weita atras riba un evento exitoso y den historia ta keda marca cu na Aruba ta caminda e organizacion nobo a nace. E comite organizador ta gradici un y tur cu a coopera pa haci e evento aki uno exitoso y asina a yuda pa Aruba su nomber keda resona positivamente den mundo. Hunto pa excelencia.