Colegio Arubano preparando un fiesta grandi na October

Pa celebra nan di 65 aniversario

• Celebracion principal riba Diasabra 19 di October
• Fiesta di 5 ora largo lo bay ta riba Plaza Capelo

ORANJESTAD (AAN): E aña aki, Colegio Arubano den Vondellaan na Playa ta marca e hecho cu nan tin 65 aña di existencia!  Desde cu el a habri na 1959, e scol di HAVO y VWO aki cu un base catolico, pero habri pa tur religion, a percura pa duna educacion na miles di hoben cu a sigui y a bira cientifico, profesor, docter, specialista medico, abogado di leynan internacional, ingeniero espacial, gobernante, prome ministro, y lidernan comercial y mas na Aruba.

   Durante un conferencia di prensa convoca na Colegio Arubano mes, Rector Tim Croes hunto cu e Comision Organizador, a trece dilanti e detaye cu e aña escolar aki ta uno sumamente special pa Colegio Arubano.  Miembronan di e Comision presente tambe tabata Jennifer Arends-Reyes (ConRector Ciclo Basico), Jarissa Dubero (docente Beeldende Vorming), Jaderick Croes (docente musica), Pierangely Wever (docente baile), y Mirella Scheper-Werleman (gerente di HR).  Colegio Arubano lo ta festehando nan mas di 6 decada y mey ta educando comunidad.

   Un siman di celebra: Pa e ocasion aki a presenta un logo special pa 65 aña cu diferente elemento simbolico cu ta representa Colegio Arubano.  Nan a trece dilanti cu preparacionnan a cuminsa desde aña escolar pasa pa asina por presenta un siman special pa e alumnonan actual.

   E celebracion lo start di Dialuna 14 di October pa henter e scol cu un celebracion eucumenico cu lo cuminza cu Himno di Colegio Arubano presenta pa e banda escolar sigui pa diferente orador y acompaña pa Eltienne Yarzagaray.

   Riba Diabierna 18 di October lo tin un ‘crazy hair day contest’ caminda alumnonan por bin scol cu un peinado creativo cu e tema di celebracion di 65 aña.

   Fiesta grandi: Pa clausura e siman festivo aki, lo ofrece na henter Colegio, ex-Colegianonan, y tambe pueblo en general, un gran fiesta titula “Ban Bek Temp’i Colegio” na e scol mes.  Esaki ta Diasabra 19 di October 2024 for di 7:00 pm te cu 12:00 am, y lo bay ta na Plaza Capelo bao di un ambiente masha ameno cuminsando cu Colegio Arubano band, DJ Sky, y agrupacionnan musical popular di Aruba, manera Tsunami y Robert y su Solo Banda Show cu lo ta special pa bailadornan.

   Riba tereno di Colegio lo tin e ‘beer wagon’ presente cu un bar bon surti y na bon prijs, asina tambe e cushina lo ta bon surti cu diferente snacks y platters. Tambe lo tin un tent di cos dushi cu bolo, drigidek, tert y hopi mas. Pa e amantenan di biña tin un ‘wine bar’ cu diferente biña.  Tur esaki ta cu cash-bar.  Pasaboca tambe ta obtenibel pa cumpra.

   Pa drenta bo tin di paga, y e prijs ta uno basta atractivo.  Carchinan ta obtenibel na administracion na Colegio Arubano durante horarionan di oficina y tambe na Plaza Book Shop. Dress-code ta Casual Elegant.  Di e forma ey, comunidad di Aruba henter ta keda invita pa uni nan mes na e celebracion di e generacionnan cu Colegio Arubano a contribui na nan formacion.

   Colegio Arubano ta agradecido pa e gran apoyo y sosten cu el a ricibi di comunidad durante transcurso di añanan.