ORANJESTAD (AAN) – Jasmira Mora-Garces, coordinador di POH y miembro di Plataforma Promocion di Salud,
a elabora, den conferencia di prensa, riba otro proyecto cu tin un aña cu ta andando, cu a wordo inicia door di IBiSA, cu ta e proyecto ‘sa bo numbernan’. Esaki a un proyecto hopi importante, pasobra bo mester sa eigenlijk con bo ta para cu bo salud. Hopi biaha e ta pasa y cu experiencia como Praktijk Ondersteuner, y tambe ultimo tempo aki cu ‘sa bo number’ den diferente screening nos sa cu cada biaha, e edad di e personanan cu tin presion halto, of cu tin sucu halto, ta birando cada biaha mas jong y esaki ta hopi alarmante”, Jasmira a relata.
El a reitera cu pesey ta hopi importante pa e persona sa su number, pasobra mas trempan cuminza, mas trempan por detecta algo, y bo por traha riba bo salud y evita pa dia di mañan bo tin un malesa cronico.
“Sa bo number, prome ta cuminza cu un screening, nos ta bay na diferente compania y na pia di trabao nos ta haci diferente screening: peso, presion, tin biaha nos ta check sucu. E di dos fase ta entrega un rapport na e companianan aki, pa asina nan sa con nan trahadornan ta para. Pasobra e compania cu ta zorg pa su trahadornan ta un compania cu ta conciente, no solamente riba e produccion di trabao, pero tambe ta mustra su trahadornan cu nan ta aprecia nan, y cu nan ta valora tambe nan salud”, señora Mora-Garces a señala. Esaki ta hiba automaticamente, na un bahada di gastonan di AZV, pasobra ta mas cu claro cu mas bo ta preveni, ta mas barata cu cura, pasobra un bez cu un persona drenta hospital of ta cuminza uza remedi, ya e ta un gasto y peso extra pa AZV.
El a sigui bisa cu e di tres fase di “Sa bo number” ta encera bay bek, pa asina duna e compania, informacion cu ta relaciona cu resultado di e compania eynan.
“Por ehemplo si un compania ta ripara cu hopi di su trahadornan ta sufri di presion halto, anto ta nos deber pa duna informacion tocante di presion halto. Tambe otro topiconan cu nos por duna informacion riba dje, ta nutricion, movecion, ya…un healthy lifestyle”, Mora-Garces a indica.
El a reitera cu esaki ta hopi importante pa “Sa bo number” y tambe pa Plataforma Promocion di Salud pa asina keda hiba esakinan dilanti, y por tin un Aruba mas saludable.
E dama a agrega cu tambe locual ta hopi importante pa menciona y pone mas enfasis riba dje, ta pa pueblo di Aruba keda conciente y sa con su salud ta bayendo. El a remarca cu Prevencion ta e miho solucion! Jasmira Mora-Garces a acentua cu e Praktijk Ondersteunernan tey pa duna informacion na tur persona cu mester, y tambe e guia personaliza pa e pashentnan cu malesa cronico, pa evita cu nan haya mas complicacion dia di mañan.
El a expresa palabranan di gradicimento na e empresanan cu a colabora door di ilumina cu luznan cora, conmemorando e Dia Mundial di Curazon, y tambe a gradici e stakeholders cu ta yuda Plataforma di Salud pa asina nan sigui traha pa Aruba su poblacion ta uno saludable.
