CALI: Un mucha chikito di 2 aña di edad a wordo hiba cu urgencia pa ricibi yudanza medico,
debi cu e tabata stik cu e pipita di un kenepa. Esey ta loke Cuerpo di Bomberonan Boluntario di Cali (Colombia) a bisa, y cu ta esnan cu a core bay atende e emergencia.
Segun Bomberonan, ta diripiente e tata di famia a yega ta pidi auxilio na un centro di asistencia na Cali, pasobra su yiu homber ta bezig ta stik. Paramediconan di Bombero mesora a drenta den accion pa cuminza atende e mucha, y nan a bin nota cu tin un obheto straño den su garganta.
Paramediconan a check mihor, y a bin topa cu un pipita di kenepa cu tabata obstaculiza e pipa respiratorio di e pulmon, y esey a pone cu el a stik y a pone cu e mucha a bay fo’i tino pa varios minuut.
Pero danki na e accion di e paramediconan, e mucha por a bin bek na tino, y cu yudanza di e cuerpo medico, a logra saca e pipita di e kenepa.
“E pipita di kenepa a bay na su luchtpijp produciendo un obstruccion total, y esaki a pone stop di hala rosea. Ora cu a pone e mucha riba un brancard, docternan a haci maniobra y a logra yuda e menor,” Bomberonan a indica.
