Jamilene Ridderstaat di bishita na Parlamento Europeo

ORANJESTAD (AAN): Riba 12 y 13 di April a tuma lugar e “Level Up” event den Parlamento Europeo na Brusselas, Belgica.

E evento aki a worde organiza pa Parlamento Europeo y European Youth Forum y tin e meta pa encurasha hobennan activo den nan sociedad pa vota pa Eleccion Europeo entre 6 y 9 di juni benidero.  Como 1.200 hoben for di diferente pais a worde selecta for di 10.000 applicacion pa sigui workshops over di diferente tema politico y tambe pa sera conoci cu miembronan di parlamento Europeo.

   Un di e hobennan cu a worde selecta ta Jamilene Ridderstaat, un Arubiano di 27 aña bibando na Hulanda. Cu un edad di 19 aña Jamilene a bay studia Pedagogiek na Fontys Hogeschool Tilburg. Durante su estudio e a haci diferente trabao voluntario den exterior. Trahando cu hobennan riba diferente proyecto na India y Kenya sigui pa seminarionan cu e a sigui na Spaña, Italia, Belgica y Alemania. Tur e oportunidadnan aki e a haya danki na e organization international Don Bosco Youth Net situa na Belgica. E organization aki ta uno catolico y tin en meta pa inspira y stimula hobennan pa desaroya nan talento  por medio di trabao voluntario y siguiendo seminars international.

   Jamilene ta un hende activo den sociedad y ta vocifera su opinion sobre di diferente topico, especialmente salud mental. Danki na su experiencia voluntario e a worde selecta hunto cu tres otro voluntario di Don Bosco Youth Net pa bishita Parlamento Europeo. Un experiencia unico unda Jamilene a sigui workshops di derecho Humano y con pa vocifera su opinion riba medionan di communicacion. E a sera conoci cu hobennan di otro pais manera Spaña,  Dinamarca, Estlandia, Gran Canaria, Inglaterra, Irlanda, India y Martinique.

   “Mi ta agradecido pa e oportunidad aki y mirando mi interes den politica. E experienca aki ta motiva mi pa sigui traha cu hobennan y stimula nan pa vocifera nan opinion. Nan opinion ta importante y politiconan tin e deber di scucha y tuma hobennan na serio””

   Awo Jamilene ta traha como un freelance trainer y coach. E ta sigui participa na diferente actividad di Don Bosco Youth Net y lo kier sigui desaroya su mes como trainer international. Un dia e lo kier trece e conocimento aki back na Aruba y stimula hobennan pa bira activo den nan comunidad.