Jaidyleen Tromp corona como Miss Teen Aruba International

ORANJESTAD (AAN): Diasabra anochi a tuma lugar certamen di Miss Teen Aruba International 2024,

y esaki a culmina ora cu a menciona e top tres candidatanan, y despues a sigui cu e anuncio principal.

   Como Miss Teen Aruba International 2024 a keda eligi Jaidyleen Tromp, kende ta representante di N-Designz y tin 15 aña di edad.  E anochi aki dedica na Carnaval di Aruba, unda cada candidata a bisti nan trahe di gala basa riba fantasia di diferente grupo di Carnaval cu a participa cune den 2024.  Jaidyleen tabatin un trahe di gala blanco basa riba disfraz di masa di OPC Carnival Group.

   Prome finalista a bira Nairobi Richardson, representando The Salon, kende tabatin trahe di gala basa riba masa di e aña aki di Los Laga Bai Carnival Group.  Segundo finalista a bira Nicole Tobar, representando Hair Beauty Extravaganza, y cu trahe basa riba masa di e aña aki di Empire Carnival Group.

   E anochi tabata hopi varia, cu cantamento, presentacion di baile di grupo NTG Dancers di Aruba, y tambe grupo di baile for di Bonaire.  Maestro di Ceremonia tabata George Winterdaal di GLW Foundation mes.

   E anochi aki a duna mas premio tambe, e.o. Nicole Tobar a bira Miss Teen Amistad, Jaidyleen Tromp a bira Miss Teen Popular, Nicole Tobar a bira Miss Teen Setar, Briannah Arrindell a bira Miss Teen Spirit.

   Tambe Jolaine Williams a bira Miss Teen Smile.  Darienne Lampe a bira Miss Teen Elegancia.  Briannah Arrindell a keda escogi como Miss Teen Fotogenica.  Nairobi Richardson a bisa Miss Teen Best Make-up.  Roleimy Martis a gana premio di Miss Teen Best Hairdo, y tambe a gana Miss Teen Best Hair.  Darienne Lampe a gana Miss Teen Disciplina.

   Premio a bay tambe pa Nairobi Richardson como Miss Teen Model.  Nicole Tobar a obtene e premio di Miss Teen Ger Gifts Aruba.  Jolaine Williams a ricibi e premio di Miss Teen Ellas Accessories.

   Nairobi Richardson a wordo escogi tambe como Miss Teen Kok Optica 2024.  Jaidyleen Tromp a bira Miss Teen Interactivo.   Nairobi Richardson a gana tambe premio di Miss Teen Best Body.  Briannah Arrindell a gana premio di Miss Teen Best Skin.