Ja Ik Aruba ta yuda hobennan con pa probecha nan talentonan pa funciona  bon den un trabao

Jalken Antonia fundador

*Cada bez mas hoben ta aplica pa e Programa Ja Ik 

ORANJESTAD (AAN) – Jalken Antonia, Fundador di Ja Ik Aruba, den entrevista cu DIARIO a menciona cu cada di mas hoben ta interesa den e programa Ja Ik,  cu tin e meta di yuda e hobennan cu ta buscando trabao, logra un oportunidad, y nan ta haya tambe hopi tips con pa uza nan talentonan positivamente.

E fundacion ta haci su parti y e hobennan a haci di nan mes, Jalken a señala. El a splica cu nan ta siña un parti di liderazgo cu nan no a haya of no a compronde.

E hoben ta wordo guia y nan ta wordo midi den nan competencia. Tur cos ta tuma lugar online. “Nan ta bisa mi cu esaki ta algo cu nan mester di dje, y e ta yuda nos. Cu esaki nos ta yuda tambe pa nan por haya un trabao y nos ta midi nan ‘drive’ pa sa ki tipo di trabao ta miho, pues no ta asina sin mas nan ta haci un trabao, pero nan ta wak kico ta fit pa nan, anto nan ta uza nan talentonan” Jalken Antonia a bisa.

Jalken ta hayando no djis alumnonan di scol cu ta aplica y forma parti di su grupo, pero tin tambe hopi persona cu no ta bay scol mas y no tin trabao. E tin un grupo nobo cu recientemente a cuminza cu e  programa “In the picture”, cu lo bishita diferente empresa local, pa haya un bista riba kico trabao na un compania ta encera. E ta un programa completamente gratis unda e hoben ta haya guia cu su liderazgo personal p’asina e por cumpli su metanan.

Jalken a cuminza cu su fundacion pasobra el a ripara cu tin hopi talento ta bay perdi, y vooral el a pensa con pa yuda nan. “Mi mes tabata tin e chens di a bira futbolista profesional y eynan el a bay. Kico a stroba mi ta cu mi no tabata tin e comprension y e actitud. Y eynan mi a wak cu esey ta e yabi pa tur cos. Den esaki mi ta wak cu talento a bay  perdi, e comprension y actitud nos no ta compronde esaki, y banda di dje nos no ta compronde e palabra etica”, Jalken a bisa.

El a menciona cu formacion ta un palabra grandi “pero nos tur por hinca un man aden pa yuda nos hobennan”, el acentua. Jalken a bisa cu e ta bayendo mas leu cu nan, pasobra ademas di training, nan ta bishita companianan, nan ta papiando cu lidernan di e compania y nan ta haci hopi enfasis riba etica, pasobra esey ta e yabi. Un hende por ta un tremendo deportista pero si e a haci kico cu e kier e por keda atras.