Grupo di Arubianonan gozando di nan vakantie na Cusco

ORANJESTAD (AAN): Cu un tour organiza pa Maduro Travel Aruba, un grupo di residente di Aruba ta gozando e siman aki di October vakantie na Peru.

   Hopi hende cara conoci a haci e viahe aki, y ta gozando di Peru unda e siman aki nan ta bishitando Cusco, Sacsayhuaman, Chinchero, Moray, y Valle Sagrado.

   Riba e potret por mira e grupo di Aruba para dilanti e ruinanan di Inca di Cusco.  E Sacsayhuaman ta e ruina mas signifciante na Cursco, y ta hopi cerca di e centro historico cu bo por djis cana y yega eynan.  Hopi turista ta para y saca potret.  Hopi hende ta pensa cu e Sacsayhuaman tin nificacion militar y religioso. 

   Hecho ta cu e ruinanan di Inca na Cusco a wordo diseña den forma di un puma, cu e Sacsayhuaman como su cabez.  E murayanan aki cu ta zig-zag tin largura di casi 300 meter, formando e diente di e puma.  Hopi hende ta asombra pa e tamaño di e piedranan aki cu cual el a wordo construi, y con complica e trabao aki tabata.

   Na Cusco, temperaturanan anochi ta baha te na 9º Celsius, y den dia e ta yega te maximo di 22º Celsius, cu ta realmente un ambiente hopi fresco y agradabel, compara cu e temperaturanan di 33º Celsius di Aruba e siman aki.