Segun Frances Rugebregt:
ORANJESTAD (AAN): Frances Rugebregt di Inspeccion di Salud Aruba (IVA) a duna di conoce cu nan n' ricibi niun caso of melding di maltrato of keho den casnan di cuido. Desde 2018, e grupo cu IVA mas ta pone enfoke riba dje ta e casnan di cuido, a remarca.
Rugebregt a sigui bisa cu regularmente nan ta haci hopi bishita y ta pidi nan pa entrega un resumen di incidente di caida y ta purba di guia nan con pa haci esaki.
El a enfatisa cu cualkier caso cu no ta bayendo bon por yama IVA pa pone nan na altura.
Banda di esaki a indica cu nan ta ripara cu tin mehoracion den e casnan di cuido, pero ta keda importante pa keda papia cu nan y monitor nan.
Ta keda un tiki dificil pa cambia e manera di pensa y pensa riba e sistema di calidad pa asina di un forma structural tin cambio cu ta keda mas largo y "no solamente ora nos ta riba nan lomba", a expresa.
IVA ta controla tur cas di cuido sin excepcion, segun Frances Rugebregt. Tur hende por duna y keho y tur esnan cu ta sinti cu algo no ta bayendo bon nan por entrega un keho contra di un persona. Famia tambe por entrega un keho pa su familiar, a señala.
Semper ta bon pa tin prueba of potret di algo cu por a pasa. Tambe ta e caso cu si IVA ta tende algo cu ta zona hopi severo y e ora nan mes por haci nan propio investigacion. Entre mas prueba, miho.
Finalmente, Rugebregt a revela cu na Aruba falta hopi pa mehora pa loke ta personal den e casnan di cuido.
