Prome 24 aña Siglo 21 a entrega Aruba retonan turistico historico
*E mercado turistico Arubano consolida versus e exigencia actual
*Thanksgiving lo duna inicio na buskeda di trankilidad di Mericano
ORANJESTAD (AAN) — Na momento cu 2025 haci su entrada pa cera e prome cuarto parti di Siglo 21, e ta entrega na historia, e resumen di uno di e periodonan mas dificil cu Aruba a conoce den su historia y cu Aruba a transforma den logro.
Nomber di Aruba ta resona na mundo, cu segun documento di expertonan economico y financiero, na 2017 a alcansa e punto di preocupacion serio pa cualkier pais.
Cu Reino tabata tin motibo pa drenta den accion na 2014, ta bira evidente den e rapportnan oficial economico y financiero di Aruba na final di 2017, cu na mes momento a bira inicio di un epoca nobo.
Pueblo di Aruba a acepta e reto pa cambio, cu a contene directamente pa Pueblo di Aruba tambe e necesidad di sacrificio cu medidanan cu mester a wordo tuma a contene.
Prome Ministro Evelyn Wever-Croes for di 2017 a duna inicio na un gobernacion di recuperacion di Aruba na momento cu desilusion di Citgo a bira e amenaza di destruccion di e animo di Aruba pa sigui cana den futuro.
Baha gasto di e aparato gubernamental tabata uno di e medidanan importante cu mester a wordo tuma pa asina baha gasto, baha e peso riba Pueblo pagador di belasting mientras ta reanima e economia, cu ta produci entrada.
Un turismo planifica y bon maneha, a percura pa ampliacion economico di Aruba, cu na 2020 mester a atende cu e asalto di Covid-19, cu a exigi Aruba cera su portanan y asina deshaci di entrada di e sector mas productivo di e pais.
Na 2020, Covid-19 a lanza un atake total riba e recuperacion di Aruba for di 2017, pero directamente despues di e final di e epoca di Covid-19, Gobierno Wever-Croes a reanima e produccion di turismo na Aruba, cu a cuminsa traha riba diversificacion di su economia.
Na salida di 2024, Aruba ta cana den direccion di e salida di e prome cuarto parti di Siglo 2025, cu turismo como su fortaleza economico.
Kico futuro lo trece pa Aruba ta depende di hopi factor cu no ta den man di Aruba. Sinembargo, e pais mester lucha pa e sigui dilanti pa confronta e final di e prome 25 añanan di Siglo 21, cu e armanan necesario pa exito continuo den su man.
Final di 2024 tin un oportunidad importante pa Aruba pero na mes momento un ambiente cu normalmente ta stroba e factornan mas importante cu e economia basa riba turismo di Aruba ta exigi.
E mercado mas importante di Aruba ta keda Estados Unidos, Merca, cu conoce un 2024 di basta problema.
Na November 2024 Pueblo di Merca mester dicidi entre otro kende lo bira su Presidente. Un lucha sumamente intenso ta conduci na e eleccion presidencial na Merca, cu na mes momento mester atende cu e forza di naturaleza expresa den temporada di horcan pero tambe na otro partinan di e pais, cu otro tipo di calamidad natural.
Poblacion di Merca, cu ta produci turismo pa Aruba, ta forma pa ser humano, cu semper ta busca alivio pa su situacionnan.
Por spera cu na momento cu eleccion ta tras di lomba, Merca prepara pa entrada na e Dianan di Fiesta cu ta cuminsa cu e Thanksgiving 28 di November, 2024, cu ta habri porta pa Aruba pa temporada halto di turismo den e maravia di fin di aña pero na 2024 lo bira caminda pa eleccion.
Ta conoci cu actividadnan politico, cu ta base di democracia, ta trece normalmente situacionnan dificil.
Na 2024, eleccion lo tuma lugar na entrada di e epoca anual mas importante pa turismo cu ta cuminsa cu Thanksgiving.
E lunanan di November y December 2024, pa e poblacion di Merca cu ta base di turismo di Aruba, ta mas importante cu nunca despues di e temponan di tension grandi cu Merca tambe a conoce.
Cambio di clima a bira horor na Merca na final di e prome 25 añanan di tanto desastre comparti na mundo. Vacacion pa e ciudadano Mericano, ta buskeda di paz, trankilidad, alegria.
Na Aruba e luna di November y entrada di December 2024, lo ta den luz di accion politico cu mester evita cu e logro enorme di Aruba riba nivel turistico, wordo afecta na forma negativo.
E turista Mericano ta cansa. Mundo ta cansa.
Sigur den luz di tanto acontecimento mundial negativo, bienestar di Aruba ta exigi, e sentido di responsabilidad di tur Arubiano, pa pone Aruba ariba, y asina garantisa cu Aruba ta sigui cana den exito comun, durante 2025, final di e prome cuarto di Siglo 21 y entrada pa loke mester bira consolidacion di exito Arubano cu aporte di e turista como su base!
