ORANJESTAD (AAN): Instituto Pedagogico Arubano (IPA) e siman aki a anuncia cu inscripcion pa
e estudio pa Maestro di Enseñansa Primario pa aña academico 2027–2028 ta habri.
E estudio aki ta forma maestro cu ta cualifica pa duna les na mucha di kleuter y basis.
Ken por inscribi: Tin dos grupo di participante cu por haci e estudio pa Maestro di Enseñansa Primario: (1) Studiante cu tin diploma di sea havo, vwo of mbo nivel 4 of cu ta den examenklas di un di esakinan. (2) Studiante cu a logra pasa e 21+ Toets di IPA cu exito.
Tur persona cu desde 1 di september 2027 tin minimo 21 aña, pero no tin diploma di sea havo, vwo of mbo nivel 4, por inscribi pa haci e asina yama 21+ Toets.
E 21+ Toets ta midi si bo tin nivel di havo cu ta necesario pa por studia na IPA. Si bo logra pasa e 21+ Toets cu exito, bo por inscribi pa e estudio pa Maestro di Enseñansa Primario. Pa mas informacion bay na www.ipaaruba.com y click riba 21+Toets.
Informacion general: Hopi persona lo desea di haya informacion general pa cu e estudio pa Maestro di Enseñansa Primario.
Tur informacion di e estudio aki ta riba website di IPA. Bishita www.ipaaruba.com y click riba opleidingen despues scoge pa Leraar Primair Onderwijs. Aki lo bo haya informacion di entre otro contenido di e estudio, kico bo por haci despues di e estudio, gasto y procedura di inscripcion.
Procedura di inscripcion: Tuma nota cu e inscripcion ta tuma luga solamente via www.ipaaruba.com.
Pa inscribi, bo mester paga 100 Florin, y agrega e comprobante di pago na e formulario di inscripcion.
indica bo nomber den e descripcion di pago. E ultimo dia pa inscribi ta dia 2 di mei 2026. Despues di e fecha aki, no por inscribi mas pa aña academico 2027–2028.
Esaki ta e oportunidad pa pone meta nobo y tuma bo futuro den bo man. Bay p’e.
