Parlamentario John Hart, fraccion AVP:
ORANJESTAD (AAN): Parlamentario John Hart, di fraccion di Partido AVP, ta spera cu pronto bin un solucion pa e carencianan cu tin riba tereno di Husticia na Aruba, y el a reitera cu e Minister y Altocomisario, tin cu sinta hunto na Parlamento, bin cu discusionnan y haya un update, y unda Parlamento tin cu haci su parti, si tin cu cambia cierto leynan, hacie. Pero ban cuminza cu bin Parlamento, pa hiba e discusionnan.
Actualmente, tanto den medionan social como den lugarnan unda nos grandinan ta reuni, y den tur e clubnan rond di Aruba, nos hendenan ta comenta cu nan ta preocupa y tin miedo di bay pafo di nan cas, cana riba caya, pasobra nan ta sinti insigur. Esaki no ta loke Aruba sa brinda nos localnan y nos bishitantenan. Tocante e argumento aki, Parlamentario Hart a reacciona bisando cu e seguridad di nos hendenan, e seguridad di nos turismo, e bishitantenan ta algo primordial. “Un di e motibonan pa cual turistanan ta bin na nos pais, ta pasobra nan ta bisa cu Aruba ta un pais limpi, pero e ta un pais sigur. “Y nos tin cu percura pa mantene esaki tambe, y pa nos, como esnan cu ta biba akinan, tambe mester por tin e trankilidad cu bo por cana cu bo yiunan den un caya, caminda cu bo no ta sinti cu bo ta wordo intimida; esey no por! Y eynan gobernantenan tin un rol, institutonan tin un rol, Parlamento tin un rol, cada un hende tin un rol”, Parlamentario John Hart a señala.
