Gruponan Ambiental a bati alarma caba
ORANJESTAD (AAN): E noticia cu a bin for di Hulanda, esta cu Ministro Wendrick Cicilia y tambe Aruba Ports Authority a firma un MoU pa mira posibilidad pa nan bin crea un Floating Farm, pa colmo mey-mey di centro di ciudad na Waf chikito... a bati alarma grandi cerca gruponan di Medio Ambiente na Aruba.
Pasobra loke nan sa for di relatonan di prensa Hulandes cu a sali publica casi 3 luna pasa, ta cu e desaroyadornan di un tan anticipa Floating Farm den waf na Rotterdam, diripiente mester bandona e Waf. Debi na cierto eror di e desaroyador pa cu e structura, y specialmente e certificado pa cu e piso riba cual e bacanan tin di para riba dje.
Hopi boerderij na Hulanda tin un piso special traha pa bacanan para riba nan henter dia, y tur “sushi di animal” ta pasa bay abao door di e piso aki, den un sorto di beerput liquido cu ta eybao. E desaroyadornan no a obtene e certificado pa e piso aki. Pesey henter e Floating Farm tabata na benta, y 28 baca tin di wordo saca bek di eynan.
Awor e gruponan local ta puntrando, si acaso ta e Floating Farm defecto aki nan lo kier bende Aruba, y bin push’e den un Waf cu ta rondona pa atraccion turistico, barco crusero, y turistanan canando paki paya meymey di tur e holor di 28 baca?
Nan ta hasta puntra, si acaso esnan cu a firma e MoU aki tabata na tino ora di firma e documento aki. Pasobra e lugar cu nan a escoge aki, lo baha tur e balor di Oranjestad, specialmente e hotelnan di Wind Creek, di Renaissance, y restaurantnan den vecindario.
