ORANJESTAD (AAN): Soroptimist International Club Aruba (SICA) ta invita pueblo di Aruba pa participa na
un elegante y agradabel Charity Wine & Cheese Party, cu lo tuma luga diabierna 4 di september 2026, di 7:00 pa 9:00 di anochi na Zucchini Restaurant.
E actividad aki tin como meta pa recauda fondo pa sostene e diferente proyectonan y iniciativanan cu SICA ta organiza durante henter aña na beneficio di comunidad. Gran parti di e actividadnan aki ta wordo ofreci completamente of practicamente gratis, pa asina mas hende por tin acceso na informacion, apoyo y oportunidadnan di desaroyo personal.
Durante aña, SICA ta organiza entre otro charlanan y sesionnan informativo riba topiconan cu ta relevante pa e necesidadnan y interes cu ta biba den comunidad. Ademas, e club ta involucra activamente den campañanan internacional manera Orange the World, cu ta pone atencion riba prevencion di violencia contra hende muhe y mucha muhe, y riba e importancia di conscientisacion, educacion y accion.
Cu e Wine & Cheese Party, SICA kier combina un anochi social y agradabel cu un meta cu tin impacto real. Participantenan por disfruta di un seleccion di wine y cheese den ambiente acogedor di Zucchini Restaurant, mientras cu nan contribucion ta yuda haci posible mas proyecto y actividad pa comunidad.
Entrada ta Afl. 125 pa persona. Soroptimist International Club Aruba ta anima tur hende cu kier pasa un bon anochi y, na mes momento, sostene un causa cu ta inverti bek den comunidad, pa forma parti di e evento special aki. Cada contribucion ta yuda nos sigui crea impacto duradero.
Pa mas informacion y reservacion, interesadonan por tuma contacto cu Soroptimist International Club Aruba riba nan pagina social y cu miembronan.
