Minister Rene Herdé:
ORANJESTAD (AAN): Asumi responsabilidad di diferente cartera ministerial ta trece un reto grandi, pero tambe e oportunidad pa pone man na obra y crea cambio. Pa Minister Rene Herdé, e decision pa nos pais di acepta e responsabilidad aki a bin cu un compromiso cla: conoce e realidad di cada departamento, identifica e desafionan existente y forma un team cu por traha riba solucionnan concreto.
Desde inicio, Minister Herdé a dedica tempo pa profundisa den e diferente retonan bou di su responsabilidad y dialoga cu e departamentonan y profesionalnan cu diariamente ta traha den e sector. Segun e minister, pa por tuma bon decision, ta esencial pa prome comprende unda e dificultadnan ta y kico ciudadano ta experimenta den practica.
E proceso tambe a inclui e formacion di un team cu ta combina conocemento, experiencia y capacidad pa atende cu e diferente prioridadnan. No tur problema por wordo soluciona di un dia pa otro, y precisamente pa Herdé ta importante pa Gobierno ta transparente y efectivo.
E minister ta enfatisa cu gobernacion responsabel no ta solamente anuncia proyecto of presenta solucion, sino tambe ehecuta esakinan y informa pueblo abiertamente tocante loke ta posibel, loke ainda mester wordo traha riba dje y e caminda necesario pa logra resultado.
“Responsabilidad ta nifica cu bo mester ta dispuesto pa scucha, conoce e problemanan y traha cu transparencia riba solucionnan cu finalmente mester beneficia pueblo,” segun Minister Herdé.
Cu e base aki, e ministerio ta sigui traha paso pa paso pa modernisa su servicio, fortalece e departamentonan y crea solucionnan cu por trece un diferencia concreto den bida diario di ciudadano.
