AFTA ta sigui supervisa e mercado di Real Estate
ORANJESTAD (AAN): E instancia di Aruba Fair Trade Authority (AFTA) a haci un investigacion riba companianan di real estate. Te cu februari 2024, e Association of Aruban Realtors (AAR) tabata tin acuerdonan di comision cu ta prohibi. Pero despues di un reunion cu AFTA, AAR a revoca su guia di comision. AFTA a sigui supervisa e mercado di real estate pa verifica si e conductanan aki a keda den pasado. E meta di e investigacion aki tabata pa determina si companianan di real estate ta cumpli cu e reglanan despues di revocacion di e guia di comision.
E resultado di e investigacion: (*) Mas o menos 48% di companianan di real estate ta sigui usa un tarifa standarisa, mayoria ta usa un porcentahe di 5%. (*) Como 74% di e companianan di real estate ta usa un reparticion fiho di e comision, normalmente 50/50 entre agentenan di real estate.
Loke ta un acuerdo di prijs: Un acuerdo di prijs ta ora companianan cu ta competido di otro ta acorda cu otro pa cobra e mesun prijs, porcentahe of reparticion. Por ehempel: ora companianan di real estate ta acorda pa cobra semper e mesun comision di 5%.
E acuerdonan aki entre companianan ta prohibi, pasobra e ta elimina of limita concurencia cu consecuencia cu consumidonan ta paga mas. Tin biaha competidonan no ta acorda cu otro por escrito, pero nan ta cobra mesun comision of porcentahe paso nan ta acorda cu otro na un manera informal of comparti informacion confidencial di nan compania. Esaki ta perhudica e consumido pa nan por negocia un miho prijs. Esaki tambe ta prohibi. Pa un competencia husto y efectivo ta importante pa companianan determina nan comportacion riba un manera independiente di nan competido.
Loke e nifica pa consumido: (*) Ta bo derecho pa negocia e comision di e agente di real estate. (*) Bo mag puntra con e tarifa ta wordo determina y cual servicionan ta inclui den e tarifa. (*) Bo por compara y busca e compania di real estate cu tin un comision cu ta fit bo presupuesto.
Aki Roly Sint Jago a declara: “E directiva di AFTA a dicidi pa sigui supervisa e mercado di real estate pa evita acuerdonan prohibi entre companianan. Mi ta yama consumidonan pa ta alerta y semper puntra pa un splicacion di e tarifa y negocia! Asina e mercado di real estate na Aruba ta keda uno competitivo, honesto y transparente.”
AFTA ta un autoridad independiente cu e tarea pa supervisa y sigura un bon funcionamento di mercado. E supervision ta dirigi riba e cumplimento di reglanan di competencia, manera describi den e Mededingingsverordening cu ta vigente desde 1 di januari 2024. Nos ta investiga mercadonan y ta tuma accion pa preveni acuerdonan anti-competitivo y abuso di posicion di poder. Y si ta necesario impone boet pa e tipo di conductanan aki. Pa mas informacion por bishita nos website na www.afta.aw.
