Prome Minister ta bolbe reitera:
ORANJESTAD (AAN) Prome Minister, señor Mike Eman, den un conferencia di prensa a contesta un pregunta, si gobierno di Aruba tin contacto cu esun di Venezuela, pa medio di e Consul Venezolano unda Aruba por tin informacion mas specifico tocante e situacion entre nos pais bisiña y Merca.
Minister Presidente a contesta (mas bien reitera) cu e relacionnan cu Venezuela, mescos cu esunnan cu Merca, primordialmente, ta cana via di e canalnan di Reino Hulandes.
“Tin presencia di un Embahada na Caracas, cu ta mantene e lineanan di comunicacion habri, y cualkier pregunta cu por tin di parti di Venezuela, nan ta dirigi nan tambe, directamente na e Embahada di Reino na Venezuela. Kiermen, si medionan di comunicacion tin cierto indicacionnan of speculacionnan, e canalnan cu ta wordo utiliza, e ora ey, di parti di e gobernacionnan (esaki ta un practica tur rond di mundo), ta e prome punto unda nan lo pidi atencion ta Embahada di Reino”, Premier Eman a enfatiza.
E dignatario a subraya cu gobierno no a sinti for di Embahada di Reino na Caracas, cu tin cualkier inkietud of desconfianza tocante con Aruba como Isla cu ta orientando su mes riba su desaroyo, su industria turistico, unda tur hende conoce Aruba como “one happy Island” y Aruba ta mantene e postura ey tambe den mundo.
