E di tres edicion di 'AF&BA Job Fair' lo ofrece mas di 500 puesto di trabao

Miriam Dabian di Aruba Food & Beverage Association a revela:

*Dia 12 di Juni proximo na Renaissance Convention Center 

ORANJESTAD (AAN): Durante un conferencia di prensa, Miriam Dabian, representante di Aruba Food& Beverage Association (AF&BA) a duna detayenan di e 'job fair' cu ta bay tuma lugar dia 12 di juni proximo.

            Hunto cu ne tabata Richenel Stamper di DPL (Departamento di Progreso Laboral), Pierre Kock, miembro di e board di AFBA y tambe Erwin Lopez, representante di EPB Hato.

            Dabian a bisa cu esaki ta bay ta e di tres edicion di Aruba Food & Beverage Association su 'job fair' cual lo tuma lugar na Renaissance Convention Center. E ta specialmente organisa pa e miembronan di AFBA pa duna nan e oportunidad pa nan por promove y ofrece e puestonan di trabao cu tin disponibel.

            Banda di esaki a invita algun instancia cu por duna informacion relevante tambe na studiante. Algun di e instancianan ta Enseñansa pa Empleo (EPE), DPL, SVb, Oficina di Turismo, entre otro.

            E 'job fair' ta bay ta solamente un dia for di 9 a. m. (pa studiante) y for di 11 a. m. te cu 7 p. m. pa pueblo en general, a indica.

            E intencion ta pa ofrece mas di 500 puesto di trabao. Lo duplica e cantidad di standnan cu a ofrece aña pasa, cual tabata un cantidad record cu 34 stand y a ofrece mas di 500 trabao. Mas di 2000 persona a bay na e feria, Miriam Dabian a indica.

            Pa e aña aki ta premira cu lo bay tin mas persona buscando trabao tempo completo of parcial of un trabao adicional. "Nos ta open como organisacion pa valora y evalua e posibilidad di duna trabaonan temporal of parcial na e personanan cu ta interesa pa busca trabao den Horeca", a expresa.

            El a enfatisa cu actualmente tin hopi posicion habri y no tin e capacidad di ocupa tur e puestonan aki disponibel den e sector di alimento y bebida. Pesey ta organisando cu mas esfuerso e feria di trabao aki pa duna e oportunidad na esnan cu ta biba na Aruba pa haya un trabao.

            Ta bay ta un evento hopi atractivo unda ta bay ofrece premionan cada ora pa asina atrae mas persona posibel y encamina e interes di e studiantenan cu ta bay kier continua of cuminsa nan profesion den e tereno di horeca.   

            E entrada na e evento lo ta totalmente gratis. Lo tin participacion di mas di 60 restaurant y bar.