Segun Alex Matthew:
ORANJESTAD (AAN)- Señor Alex Matthew, representante di Chania Fernandez Pedra, a sigui bisa den conferencia di prensa, cu dia 3 di Juli Chania a bay Corte sin un representante, y ora cu el a yega den Corte, for di prome cu esey caba, el a pidi pa e por haya un abogado pa represent’e. El a bisa cu no ta algo cu el a pidi pasobra e ta pidiendo Corte of Fiscal un fabor, sino pasobra esey ta su derecho.
“E ta cera, mi kier pa tur hende compronde cu e ta cera. Nos no ta bringando e hecho ey ainda, nos no ta defendiendo Chania su caso tampoco ainda, locual nos ta defendiendo ta su derecho cu e tin como ser humano. Bo no por viola e persona aki su derecho door di no dune un abogado”, Matthew a declara.
Matthew a agrega cu nan a expect e ora ey cu e Huez a schedule dia 20 di Augustus (un luna y algun di mas) pa e caso di Chania wordo trata, pero como cu Chania no tin un abogado locual Alex Matthew no ta compronde.
“Corda bon, OM ta esun responsabel pa zorg pa Chania tin un abogado. Y, OM no por a haya un abogado p’e te dia 3 di Juli. Despues e Huez a schedule e caso pa wordo trata dia 20 di Augustus pasobra Chania no tin un abogado. Mi ta wak con esaki por ta hasta posibel. Pasobra por wel por ta cu ora e persona aki haya un abogado, e mester a haya door di e Fiscal; e abogado ey mester haya full e file, mester les’e, mester procesa e file, investiga anto pidi locual e kier pa wordo investiga ainda. Esey ta literalmente e derechonan di Chania.
Anto, con e Huez por a schedule e caso un luna despues pa wordo trata. Anto, el a yega dia 20 keriendo cu tur e temponan ey e ta sinta den un prizon cu ta afgeurd, e ta sinta den e mesun recinto cu tur otro detenido cu ya a wordo sentencia, cosnan cu no por”, Matthew a remarca.
Matthew ta cuestiona cu e prizon tin añanan den mal condicion y cu no tin un lugar pa un persona cu su caso ta diferente, pa e warda su caso yega pa e por defende su mes. Pero nan ta tratando Chania comosifuera e ta culpable caba.
