CARACAS: E primer actor venezolano, Eduardo Serrano tin mester di donacion urgente di placa, despues cu el a wordo diagnostica cu cancer,
y e ta awor den un procedo medico complica. Su yiu muhe Magaly, a dicidi sali dilanti ta pidi yudansa di e bon boluntad di e Venezolanonan kendenan pa hopi decada a disfruta di e trabao di su tata den e epoca di oro di Television Venezolano y e novelanan.
Como un luna pasa, e actor a ricibi e noticia cu e tin varios cel di cancer den un pulmon, y cu esaki lo a plama caba pa su cerebro, y tambe a detecta den su blaas di urina, pa cual ya nan a haci operacion di nefrostomie, pues e tin un saco colga pafo di su stoma cu ta colecta urina.
E situacion complica aki den Hospital, a obliga famianan pa habri un sistema di GoFundMe pa recauda fondo pa varios terapia di chemo y procedimentonan medico cu tin di wordo cubri.
Den presencia di Mirtha Pérez, Magaly Serrano como yiu a mustra di ta basta conmovi ora di duna e noticia.
“Nos mester recauda un cantidad di placa pa nan yuda nos. Nos mester di un nurse na cas... e unico entrada cu nos tin na cas ta di mi comprometido. Nos mester di articulonan special pa por tin’e na cas, e.o. pa su proximo chemo,” el a splica.
Su siguiente sesion di chemo lo bay ta dia 20 di Augustus venidero, y pesey nan mester colecta lo mas hopi placa posibel pa cubri e gastonan medico.
Hopi stima door di pueblo Venezolano, Eduardo Serrano ta un di e actornan cu a sobresali na Venezuela, y a aparece den mas di 20 produccion. El a cuminza su carera hopi hoben, cu interes den actuacion, cu a pone debuta na TV Venezolano cu apenas 23 aña di edad.
Apesar cu e tabatin experiencia como actor di doblahe y tambe teatro, su chens grandi a yega cu e telenovela ‘Las Amazonas’, unda e tabata e protagonista hunto cu un elenco di taya grandi manera Hilda Carrero, Corina Azopardo, Alba Roversi, Julio Alcazar, y Flor Nuñez, entre otro.
Otro proyectonan cu el a sobresali den dje tabata “Viva la Pepa”, tambe “Natalia del Mar”, “Juana, la Virgen”, “La Mujer Perfecta” y mas.
Sin duda, Eduardo Serrano ta un actor di prome linea, cu danki na su rolnan hunga riba TV, a gana e cariño di publico Venezolano. Esnan di Aruba tambe por haci donacion via e website aki:
www.bit.ly/eduardohelp
Meta di e GoFundMe ta pa yega na $28.000 pa yuda. E campaña a start Diabierna, y ya caba riba Diadomingo atardi, cu un total di 453 hende cu a haci donacion, nan a yega na $20.200 caba pa yuda Eduardo, pues 72% di loke nan kier recauda. Ainda tin chens pa haci esey.
