Parlamentario Hendrik Tevreden ta comparti desaroyo importante
ORANJESTAD (AAN): Parlamentario Hendrik Tevreden, Lider di Fraccion di MEP, a informa cu pa prome biaha, cuido y rehabilitacion pa hende muhenan den adiccion lo bira un realidad atrobe na Aruba.
Un suma di Afl. 130.000 lo wordo aloca pa renobacion di e afdeling pa hende muhenan y pa crea un detoxkamer na Stichting Hunto, un infrastructura sumamente necesario pa maneho di pashentnan cu adiccion. Tevreden a percura den Parlamento pa un mocion wordo entrega pa e cambernan aki por wordo realisa.
Renobacion y Construccion di Detoxkamer
E suma destina ta contempla dos aspecto importante:
- Renobacion di Vrouwenafdeling: Esaki lo inclui traha riba di e deficitnan structural cu e departamento actualmente ta sufri, pa asegura un medio di cuido seguro y efectivo.
- Desaroyo di un Detoxkamer: Na Aruba, te awor no tin un espacio specialisa pa maneho di desintoxicacion. Esaki ta pone hende cu mester cuido den situacionnan di adiccion den un gran desventaha.
Cu e alocacion aki, un infrastructura lo wordo crea pa permiti cu pashentnan por wordo evalua, y si ta necesario, intern'e pa ricibi tratamento profesional desde e prome fase di desintoxicacion.
Un paso importante pa maneho di adiccion na Aruba
Tevreden a enfatisa cu e falta di un detoxkamer na Aruba tabata crea hopi desafio. Frecuentemente, clientenan cu ta mustra sintomanan di intoxicacion ta wordo nenga entrada, of nan ta wordo manda hospital pa motibo di nan condicion.
Un detoxkamer lo posibilita cu personal specialisa den e area por maneha e caso aki di un manera profesional y rapido, preparando nan pa rehabilitacion pa un bida mas stabil.
Aporta pa solucion na momento di crisis
Cu e desaroyo di e cambernan aki, Stichting Hunto no solamente lo por eleva e nivel di cuido pa nan pashentnan, pero tambe lo haya capacidad pa crea un crisisteam y un crisislijn, pa atencion durante e momentonan mas dificil den bida di un cliente.
Tevreden a expresa su aprecio pa Minister Rocco Tjon, cu a presupuesta e suma necesario y a mustra e importancia di e infrastructura nobo como un balor agrega pa nos comunidad.
Un logro pa Parlamento y comunidad
“Nos ta hopi satisfecho cu por forma parti di un proceso asina importante”, segun Tevreden. “Ambos, e renobacion di e vrouwenafdeling y construccion di e detoxkamer ta habri un futuro di mihor cuido pa e hende mas vulnerabel den nos sociedad”.
