Hopi produccion na hardin di Fruta y Berdura na Scol Primario Kudawecha

ORANJESTAD (AAN): Sigur hopi bon noticia procedente di e Hardin di Fruta y Berdura na Scol Primario Kudawecha, den cuadro di e proyecto di Agroforesteria.

   Aunke na e scol mes, nan ta yamando esaki “Mondi di Alimentacion S.P.K.”.  Loke a sorprende hopi hende ta cu den fin di siman, nan a divulga cu ya caba nan ‘mondi’ ta suministrando nan cu hopi alimentacion.

   E alumnonan di scol hunto cu docentenan, y demas boluntario ta sigui yuda mantene e ‘mondi’ den bon condicion.  Nan ta yama nan como e “indjannan chikito cu ta traha duro den nos mondi”.

   Loke ta mas impresionante, ta e cantidad di cosecha cu e hardin ya caba ta produciendo.  Den apenas algun luna, por mira tur nan cosecha.  E alumnonan ya caba ta considerando nan mes como ‘Cunukero di Kudawecha”.

   Sinembargo awor tin mas trabao pa haci, y pesey ta haci suplica na publico. Nan mester di mas manpower pa yuda cu e hardin aki.  Pesey tur boluntario (mayor, welo, omo, tanta, demas famia y conocir) ta bon bini pa yuda nan mantene e cunuco di alimentacion.

   Djis pasa durante ora di scol, y raporta na cabesante pa asina e proceso por sigui cana!  Djis corda cu ta haciendo esaki pa e futuro generacion, por siña y alabes stima pa planta y produci nan mesun cuminda den futuro.