Na Aruba tambe un grupo creciente di victimanan ta wordo registra
*Imagen horta di personanan popular a bira trampa di criminalnan
ORANJESTAD(AAN)—Un mensahe ta drenta riba internet. Un persona inocente ta wordo confronta cu un mensahe cu ta splica cu un persona hopi conoci den comunidad, a bira miyonario.
Esaki ta inicio di dramanan cu ta presenta nan mes mundialmente na e momento aki y ta motibo tambe di alarma grandi di parti di comercio legal internacional na clientenan, cu ta wordo confronta realmente cu un trampa peligroso.
Den mensahenan cu ta parce di ta bini di personanan conoci, fotonan horta y manipula di caranan conoci, ta keda presenta.
Segun e mensahenan cu ta alcansa publico, e personanan cu ta aparece riba e portretnan, lo a nenga di haci uzo di banconan local y otro medionan oficial pa trafico di placa, y asina a bira multi miyonario na forma asombroso dor di manda nan placa pa un compania cu ta percura pa e persona cu ricibi e mensahe, bira miyonario den tempo cortico.
Un invitacion ta wordo haci na personanan cu ta ricibi e mensahe, pa uni nan mes na e forma nobo pa crea un fortuna na un forma hopi facil. Tur loke nan mester haci ta, uni na e grupo cu ta habri posibilidad cu ningun banco oficial y conoci por brinda.
Hende inocente cu no ta tuma molestia pa acudi na fuentenan oficial di informacion ni ta consulta autoridad, ta cay den un trampa na nivel mundial.
Nan ta sigui pasonan cu nan lo mester tuma pa asina nan placa resulta cerca ladronnan cu ta sconde tras di sistemanan nobo pa bira rico.
Nan no ta splica cu e formulanan aki, ta habri posibilidad pa hende bira rico y cu e hendenan cu ta bira rico, no ta e hendenan cu nan ta acerca riba internet, pero nan mes persona como ladron cu ta haci hende inocente nan victima.
Na nivel internacional, autoridad ta wordo confronta cu e problema serio di personanan cu ta permiti ladronnan moderno, haci nan victima di e sistema nobo di ladronicia pa medio di mensahenan di computer.
Ora e victimanan realiza cu nan a wordo usa dor di ladronnan cu a apodera di nan entrada na comunicacion via internet, ya ta laat y ningun hende por yuda nan mas.
Informantenan ta papia di un tipo internacional di crimen organisa, sumamente poderoso, cu ta abusa di hende inocente riba computer sin laga rastro y posibilidad pa realmente por actua contra nan.
Alarma ta wordo bati na Aruba tambe dor di fuentenan cu ta mustra con personanan cu a spaar nan placa, ta cay den e trampa di e ladronnan cu na un forma of otro sa di penetra den sistemanan di contacto cu nan no a proteha bon riba computer.
Ta socede cu hasta ora acerca un compania financiero, e oportunidad ta presente cu ladronnan a “hack” (penetra y controla) e sistema di un compania oficial pa busca mas victima pa nan sistema di ladronicia.
Pues un persona por ta tuma contacto cu un instancia oficial, pero ta haya su mes confronta cu e oferta di e ladronnan, cu na Merca por ehempel ta uza hasta nomber di personanan prominente pa nan maniobranan di ladron.
Hopi hende ta acudi na autoridad ora nan placa desaparece pero ya ta laat pasobra hasta polis no por haci nada mas pasobra e instancianan ladron cu identidad falso riba computer ta inalcansabel.
Un peticion ta bay pa no permiti ningun contacto cu companianan cu ta uza internet tanto via telefon como computer y hasta ta presenta caranan conoci falsifica pa pidi ciudadanonan inocente, manda placa pa nan na un forma regular pa asina crea fortuna cu ta mentira.
Tampoco start ningun charla of otro contacto cu personanan desconoci cu ta trata di establece un lazo di confianza pa asina nan por horta sumanan enorme for di personanan inocente.
DIARIO ta sigui acumula informacion pa tene Pueblo di Aruba na haltura di un situacion sumamente serio y peligroso na nivel internacional y local!
