Sorpresa cu te awe den formacion no a atende cu corupcion
*Gerlien a crece pa e impresion di no sostene Benny den Parlamento
*Indicacion cu Corte Supremo lo dicidi riba tratamento di Avestruz
ORANJESTAD(AAN)—Uno di e aspectonan mas importante na Aruba na e momentonan aki, ta e posicion cu por spera di parti di Reino enfrente futuro gobernacion di Aruba y casonan di corupcion.
Informantenan clave di DIARIO a trece dilanti, cu ta increibel con caida inespera di Gobierno Evelyn Wever-Croes a desaroya pero peor ainda con hasta a permiti pa un delincuente, castiga dor di Huez, por a sigui gana placa di belasting di Pueblo como Miembro di Parlamento.
Cu delincuencia comete dor di un gobernante afirma den sentencianan di Huez y Corte di Husticia, no ta aceptabel pa un gobernante, ta bini dilanti den e leynan di Aruba cu ta dicidi kende por bira Ministro di e pais Aruba a base di screening cu nan mester pasa.
Na e momentonan aki uno di e sorpresanan mas grandi cu formacion di un gobierno nobo ta produci pa publico ta, cu te awor tur cu a atende e tema no a duna atencion aparente na e base moral di gobernacion di e pais, hancra sigur den e forma cu ta atende cu criminalidad den gobernacion.
Informantenan ta mustra cu Gerlien Croes a haya popularidad enorme na momento cu den e tempo cu Avestruz y condena di Benny Sevinger, el a retira di e partido berde y a bay lanta su propio partido.
El a crea asina e impresion cu e no tabata di acuerdo cu Mike Eman a exigi pa Aruba acepta un criminal den Parlamento, cu ta wordo paga cu placa di belasting di e trahador pa representa Pueblo.
Den vista di Pueblo esaki tabata motibo cu Gerlien Croes no a pone su mes na e nivel di Mike Eman, cu a perde tur popularidad y mester a bay busca auxilio di un cara nobo como lider di AVP, cu por a produci e cantidad di votonan cu Mike Eman a haya.
Sinembargo, ya den Parlamento tabata tin indicacion di un bon entendimento entre e partidonan di Mike Eman y Gerlien Croes, cu den un acto cu tabata un sorpresa total, a vota hunto cu Benny Sevinger pa habri porta pa Gobierno Evelyn Wever-Croes bay cas.
Ta aden e tempo aki Gerlien Croes a aclarea cu e no tabata realmente contra presencia di Benny Sevinger den Parlamento, manera Mike Eman a exigi y wordo considera motibo di kiebra di AVP y Gerlien Croes.
De facto, Partido AVP a wordo completamente renoba den e constelacion di Parlamento cu a bay cas, cu Gerlien Croes formando un union cu Mike Eman y resto di AVP hunto cu Benny Sevinger.
Informantenan clave di DIARIO, a mustra con den e formacion di un Gobierno nobo, te awor solamente ta wordo papia di con placa lo circula, cu ta parce di ta e preocupacion mas grandi y no e forma cu Reino awe ta mira Aruba y ta bini cu exigencia pisa pa gobernacion, cu ta resultado di e forma cu entre otro Avestruz a cana na Aruba.
DIARIO ta den contacto directo cu instancianan den formacion di un Gobierno nobo pa Aruba na momento cu na Hulanda, ta spera ainda di informacionnan cu nan mester ricibi di un abogado di kende DIARIO tin e nomber.
Informantenan ta bisa cu for di December ya Corte di Husticia a manda e Proces Verbaal y cu Corte Supremo di Husticia na Hulanda, mester contact e abogado di Sevinger na Hulanda.
Lo mester yega na un conseho pa bay Corte Supremo ainda, pero indicacion ta cu Caso Avestruz lo wordo trata pa Corte Supremo.
Mientrastanto den e consultanan y preparacionnan pa un Gobierno nobo pa Aruba, pregunta grandi ta keda e parti di moral y loke ta permisibel y no permisibel y sigur lo mester a haya atencion pa e hecho cu atrobe un gobernacion di AVP a termina cu miembronan di Gobierno condena na prison.
