Interesante pa mira asina hopi mucha interesa den musica di piano

Live musica na Sizzle

ORANJESTAD (AAN): Recientemente DIARIO a tuma nota cu e Compleho di Entretenimento y Cinema, esta Gloria, tin musica en vivo tambe den oranan trempan di anochi.

   Tabata na e restaurant Sizzle, cu DIARIO a topa cu e conocido colaborador Gerardo Sanson kende tabata na su piano ta entretene clientenan cu ta disfruta di delicioso cuminda cu e personal profesional ta prepara na forma ingenioso.

   Como cu Gloria ta un lugar rondona pa mundo di cinematografia, Gerardo ta percura pa den su repertorio e inclui musica di e peliculanan di mas clasico cu tur hende gusta.  DIARIO a mira con turistanan a encanta ora el a toca e tema musical di Star Wars, y tambe di Gone with the Wind.  Tabatin cliente cu hasta ta pidi cancion, y e ta cumpli cu nan.

   Muchanan cu yega cerca di e piano, tambe ta haya chens pa siña toca un rato y e alegria riba cara di e muchanan tabata uno inolvidable, y sigur nan lo haya e experiencia unico aki cu kizas ta desemboca den un futuro carera pa haya les y siña toca piano.

   E combinacion di Sizzle cu musica di piano, sigur uno cu ta cayendo hopi na agrado di esnan cu ta pasa un anochi divertido.