Interesante exposicion di hobennan Haitiano presenta den Cas di Cultura

Cu e meta di crea un grupo di artista hoben di henter Aruba:

ORANJESTAD (AAN) – Un grupo di hoben Haitiano,  a presenta un exposicion di diferente expresion cultural, den Cas di Cultura, diasabra ultimo 21 di Augustus.

Den un entrevista cu DIARIO, Manouchca Lamontagne a splica un poco di nan expo aki, cu tin como meta stimula y encurasha hobennan tanto Arubiano como di otro nacionalidadnan residente na Aruba, pa descubri nan talento tanto den arte, como den productonan organico, traha pa nan mes.

Den e exposicion aki, por a mira bunita sombre, tas, slof hopi creativo cu style varia, productonan pa makiyahe, peluca, productonan organico cu nan mes ta traha manera nan ponche crema y otro bebidanan, ademas di accesorios di fantasia, maner arband. Peterson Lamontagne ta un di e artistanan cu ta traha hopi arte bunita, Manouchca a menciona.

“E meta di e exposicion aki ta, pa duna nos hobennan, e oportunidad di descubri nan talento y kico nan por haci pa e pueblo di Aruba”, Manouchca a bisa y a indica cu tur aña nan lo sigui trece un expo asina dilanti, pa asina e hobennan cu no a haya e oportunidad e biaha aki pa mustra nan talento e otro aña haya chens pa participa tambe, y encurasha e hobennan Arubiano y di otro nacionalidadnan biba na Aruba, pa tambe nan mustra nan potencial y desaroya nan habilidadnan creativo. Cu otro palabra, e motivacion tras di e expo aki ta crea un grupo di hoben artista di henter Aruba, pa traha y expone hunto! Un bunita iniciativa sigur di aplaudi.