Interes pa e Trayecto Formacion Social ta creciendo y e bista riba kico ta SVT ta cambiando

Jessy Ras, Directora ta remarca:

ORANJESTAD (AAN) – Jessy Ras, Directora di Proyecto Formacion Social, a duna di conoce den entrevista cu DIARIO, cu dia 21 di Augustus nan a cuminza cu e di dos grupo di dama pa SVT.

Ras a menciona cu tabata tin mas of menos 30 inscripcion y despues di e seleccion 13 hoben pa start, dia 21 di Augustus; un hoben no a presenta y a cuminza cu 12.

            Durante e transcurso di e di dos siman, otro hoben a haya cu esey no ta p’e y a trata di motive, incluso su famia, pero e tabata determina y a cay afo. Aworaki tin 11 hoben hopi motiva y nan ta haya e actividadnan hopi interesante y particular. Nan kier mas informacion y a cuminza cu diferente instancia pa duna nan charla. Nan a cuminza aworaki cu formacion di caracter, maneho di agresion, nan a pasa dos dia den cursonan di Wit Gele Kruis pa EHBO, y e siman aki nan ta finaliza esaki pa haya un certificado tambe.

            “Asina nan ta haya diferente actividad no solamente di e parti militar, pero ehercicio y tambe nan ta bezig trahando riba nan mes”, Ras a señala.

            STV a caba di habri tambe inscripcion pa mucha homber. “Esey ta bay bira SVT Formacion Social grupo 17. Nos ta bay cuminza 4 di Maart 2024. Nos tin un procedure di seleccion, y muchanan homber den edad di 17 ta cu 24 aña cu tin interes por registra. Nos tin un link riba nos facebook page, unda ya caba nan por yena nan informacion eynan, y nos ta tuma contacto cu nan mas pronto posible pa un afspraak”, Jessy Ras a bisa.

            “Nos tin cu bisa cu na November nos ta bay haci 12 aña bezig cu e Trayecto Formacion Social, y ya caba nos a finaliza 15 grupo di mucha homber, un grupo di mucha muher, pues ya caba e pueblo di Aruba sa kico nos ta bezig cune, no solamente mayornan pero tambe diferente compania cu ta interesa den sea tuma e muchanan aki como stagiaire of como trahado. Pues nos por mira cu e interes ta creciendo” Jessy Ras a subraya.

            Ras a remarca cu ainda tin hende ta pensa cu e trayecto aki ta solamente pa hoben cu tin un comportacion dificil, pero esey no ta berdad. Formacion Social ta habri pa tur hoben. Ya caba nan ta acercando hobennan cu a caba MAVO, pasobra por wak’e como un gran posibilidad si nan tin interes den e parti militar. E trayecto aki ta manera un “voor opleiding”. Jessy a agrega cu e bista riba kico ta SVT ta cambiando.