Relacionista Publico Nen Flores cu informacion:
ORANJESTAD (AAN) – Nen Flores, Relacionista Publico di Mary Joan Foundation, ta informa cu e fundacion ta bay tin un caminata dia 29 di October, cu un toke diferente, unda cu e tema di e aña aki ta: “Descubri naturaleza, descubri bo mes”. Asina tambe MJF ta duna sosten na Salud Mental.
E caminata ta bay cuminza pa 6.30 or di mainta, pa asina hunto wak e solo Sali pero ta invita comunidad completo, pa tey caba for di 6’or, pa asina por prepara, sali hunto “descubri naturaleza y descubri nos mes”, Flores a reitera. Tin un suma di colaboracion envolvi. E prome cien personanan cu lo inscribi lo haya un bunita obsequio. E canamento lo sali for di Bushiribana.
Flores a menciona cu e aña aki no tin flanel, pero e Fundacion ta encurasha tur hende pa decora nan flanel, cu colornan bright. E flanel miho decora tin posibilidad di gana diferente premio, y tambe lo haci uso di cups recyclable. Por diseña nan cu e logo di Mari Joan, of cu cinta rose, pa asina duna sosten pa locual ta concientizacion riba cancer na pecho, y asina tambe tin e posibilidad di gana diferente premio alavez cu e participante ta contribui na un bon causa.
Mary Joan Foundation a cambia di localidad. Awo ta ubica na Caya Apeldam #2 na Dakota. Nen Flores ta pidi pa tene bon cuenta cu esaki.
E meta di MJF ta yega na 60 mil florin pa cubri gasto. E ta duna sosten no solamente na e cliente pero tambe na nan famia. Un di e costonan halto cu e fundacion tin, ta por ehemplo brinda sosten psicologico na e familiar cu tin cancer. Tin diferente proyecto cu mester di sosten financiero, manera “un peluca, un sonrisa”, y un actividad cu nan ta haci tur luna, cu tambe ta rekeri fondo. E aña aki, tambe MJF ta bezig ta colecta fondo, pero e aña aki ta slow mirando cu tin hopi calor, y no ta dje facil ey pa un hende bay para band’i caminda y colect. Nan ta encurasha companianan pa tuma contacto cu e fundacion, tuma un bus y pon’e den bo localidad unda hendenan por haci nan donacion.
