Segun Jonathan Trinidad di Universidad di Aruba:
ORANJESTAD (AAN): E necesidad di trahadornan social na Aruba ta sigui manifesta den diferente sector, mientras cu entre hobennan tin un interes creciente pa studia e profesion aki. Asina Jonathan Trinidad, manager di Social Work & Development na Universidad di Aruba, a splica, destacando e importancia di prepara profesionalnan pa atende e desafionan social den comunidad.
Trinidad a indica cu e programa di Social Work & Development tin un duracion di cuatro aña. Segun e, studiantenan cu completa e programa no solamente ta obtene un titulo, sino tambe e preparacion y cualificacion necesario pa cuminsa eherce como trahador social di inmediato.
El a señala cu e problemanan social ta manifesta diariamente y ta sigui aumenta den comunidad. Den e contexto aki, a observa un interes creciente entre studiantenan pa amplia nan conocemento y desaroya e capacidadnan necesario pa contribui na prevencion, atencion y reduccion di e problemanan aki.
Trinidad a destaca ademas cu e demanda pa trahadornan social ta grandi, un necesidad cu ta wordo manifesta frecuentemente den, entre otro, e sectornan di husticia y enseñansa y expresa den medionan.
“Nos ta contento di contribui na comunidad di Aruba den e formato aki. Ya nos tin un grupo cu ta finalisando e aña academico aki, y asina nos por contribui cu un grupo nobo di trahador social”, Trinidad a expresa.
Cu e grupo cu ta finalisando su estudio e aña academico aki, Universidad di Aruba ta sigui contribui na formacion di profesionalnan cu por atende e necesidadnan social di e pais y aporta na bienestar di comunidad.
