Minister Gerlien Croes: E realidad di Pais Aruba
- Y tin cu atende cu e consecuencianan
ORANJESTAD (AAN)- Minister Gerlien Croes siguiendo cu e tema di surplus, den entrevista cu DIARIO, a señala cu na momento cu nan a ser instala como Gobierno AVP-Futuro, e prome anochi nan a traha un presupuesto.
“Y kico nos a haci cu e surplus? Destina parti di dje pa e pensionado. E prome dia di Gobierno 250 Florin e anochi ey a wordo aproba extra na reparatie toeslag. Anto, di con e gobierno cu ta papia di surplus no a duna e pueblo bek, si tabata tin surplus? E no tabata tin e intencion di duna pueblo bek e ora ey. Pasobra el a pon’e riba papel, pero no a duna pueblo nada!”, segun e dignatario.
E dama a agrega cu esaki ta e cosnan cu nan mester papia abierto y erleg. “Ban bisa e cos manera cu e ta. A mi ta bisa, mi no tin nada di wak atras, mi tin cu wak dilanti awo. E hecho ta, papiando di surplus, con nos ta bay financia 400 miyon na scolnan. Unda e placa ta? Nos no tin na e momentonan aki”, e dignatario a subraya.
Minister Gerlien Croes a comenta cu Diabierna ultimo, gobierno a caba di aproba 59 miyon Florin, for di cual 33 miyon ta sali di e presupuesto aproba caba, y e resto di e supletorio.
“Si wak bon, e proyectonan cu nos ta presenta hopi di nan ta proyectonan cu ta necesidad. Proyectonan cu eigenlijk, no mester t’asina. Ki mishi bo tin scolnan bashi pa añanan? Ki mishi un gobierno tabata tin intencion di duna e scol aki den man di comerciante eyfo priva, y bon tin cinco scol na Aruba sin scol. Un Arubahuis cu nos a haya casi ta cay den otro. Ya, nan a cuminza cu un plan den tempo di nan gobernacion, pero esey ta un otro cos; yen proyecto ‘ah, ta nos proyecto’, si, pero bo no a ehecuta ni un! Dus, ora cu nos papia di surplus, ban midi den un aña y mey, kico nos ta bezig ta haciendo na inversion. Cu nos ta na unda cu nos kier ta? No at all. Nos tin hopi pa haci pa Aruba ainda. Pero ta lastima si, y e discusion financiero ta bin dilanti, e mesun necesidadnan aki no ta parti cu ta wordo reconoci”, segun minister Gerlien Croes.
El a conclui bisando cu ora cu, como Partido nan a para pa refinancia cu Hulanda pa nan haya un renta financiero mas amplio, e ora ey e discusion di autonomia a bin dilanti, cu nos ta bay entrega nos autonomia.
“Si nos keda cu nos autonomia y cu tur e debenan cu nos tin cu pueblo, pa un bida di miho calidad pa Aruba, nos no ta logra yega nunca, unda cu e 60 miyon pa aña cu nos ta inverti den pueblo, y e 400 miyon cu ami mester pa onderwijs, ta ki aña nos ta keda cla? Esakinan ta dialogo tur ora, ta retonan cu nos ta deal cu ne tur ora, tur Diabierna tur Diamars, ta e mesun topiconan aki, di necesidad, di financiamento, di e situacion actual, y fuera di esey, urgencianan cu ta presenta continuamente. Pa motibo di falta di structura di hopi aña, na e momentonan aki nos ta cay atras y nos ta atende cu consecuencianan. Esey ta e realidad di pais Aruba”, Minister Gerlien Croes a resalta.
